Primeiru Ministru Hahú Preokupa Importasaun Sigaru mai TL

0
47
Primeiru Ministru, Rui Maria de Araújo. Foto GPM

DILI, (TATOLI) – Primeiru Ministru, Rui Maria de Araújo preokupa ho númeru importasaun sigaru mai Timor-Leste iha 2016 hamutuk tonelada 16 hodi rezulta populasaun adultu pursentu 70 no joven pursentu 40 maka fuma.

“Tuir informasaun ne’ebé alfándega relata iha tinan 2016, Timor-Leste importa tabaku maizumenus tonelada 16 ne’e hanesan mos ita exporta kafé ba rai liur oituan no ita importa sigaru maka barak”, dehan Xefe Governu iha Ministériu Saúde Kaikoli, foin lalais ne’e.

Lider governu hatutan sei esforsu atu kria dekretu lei hodi regula importasaun tabaku mai rai laran. Tuir nia, sigaru ne’ebé sei tama tenke tuir kriteria governu hanesan iha sigaru nia kulit tenke deskreve imajen no liafuan kona-ba impaktu hosi fuma.

“Alfándega sei fiskaliza no kontrolu sigaru hotu hotu ne’ebé tama mai rai laran tenke priense kriteria se-la’e haruka para”, tenik.

Lider governu hateten ministériu saúde no polísia sei halo sosializasaun ba públiku kona-ba rejime kontrolu tabaku.

Iha rejime ne’e sei fó multa ba sidadaun ne’ebé la kumpri regras hodi kontinua fuma iha fatin públiku hanesan estrada públiku, transporte públiku no seluktan.

Jornalista: Agapito dos Santos

Editora: Rita Almeida

HUSIK IDA HATÁN