Prezidenti Republika Promulga Ona Lei Rai

0
1088
Prezidenti Repúblika, Dr. Francisco Guterres Lú-Olo konversa ho Ministru Koordenadór asuntu Justisa no Ministru Administrasaun Estatal, Dionísio Babo, iha salaun VIP Aeruportu Internasionál Prezidenti Nicolau Lobato, Comoro, Dili, sesta ne´e, molok prezidenti aranka ba Malázia hodi halo tratamentu saúde. Imajen espesiál.

DILI (TATOLI)—Prezidenti Repúblika, Dr. Francisco Guterres Lú-Olo promulga ona Rejime Jurídiku Kona-ba Na’in ba Rai iha kinta (01/5/17).

Rejime Jurídiku ida ne’e hahú iha Kuartu Governu Konstitusionál no hato’o ba Prezidenti Repúblika Dr. José Ramos Horta maibé Prezidenti Horta halo veto polítiku iha tinan 2012.

Iha tinan 2017, Parlamentu Nasionál haruka fila fali Rejime ne’e mai Prezidenti Repúblika Taur Matan Ruak, ne’ebé haruka ba Tribunál Rekursu hodi husu atu halo fiskalizasaun preventiva kona-ba konstitusionalidade. Koletivu Juíz Tribunál Rekursu deklara katak laiha inkonstitusionalidade ruma.

 “Ha’u haree katak Lei ne’e bele garante ona seguransa ba ita-nia populasaun sira, seguransa ba ita-nia Estadu no seguransa  ba ema hotu-hotu ne’ebé iha direitu ba rai. Tanba ne’e maka Prezidenti Repúblika promulga Rejime ida ne’e,” Prezidenti Lú-Olo hateten argumentu ne´e liuhusi komunikadu imprensa hosi Mídia Palásiu Prezidénsia Repúblika ne´ebé Ajénsia TATOLI asesu iha sesta lorokraik ne´e.

Lú-Olo agradese entidade sira Estadu no la’ós Estadu nian sira hanesan sosiedade sivíl, inklui ONG sira, ne’ebé maka fó ona sira-nia kontribuisaun hodi hamosu ona Rejime Jurídiku kona-ba Na’in ba Rai iha Timor-Leste.

Rejime ida ne’e Prezidenti Republika haruka fali ona ba Parlamentu Nasionál atu haruka ba publikasaun iha Jornál Republika. (Jornalista: Xisto Freitas)

 

 

HUSIK IDA HATÁN