Prezidenti PN Informa Atividade Parlamentu Ba PR

0
34
Prezidenti Parlamentu Nasionál, Aderito Hugo da Costa.

DILI (TATOLI)—Prezidenti Parlamentu Nasionál, Aderito Hugo da Costa informa atividade Parlamentu Nasionál (PN) nian liu-liu Dekretu Lejilzasaun lubuk ida ba Prezidenti Repúblika, Dr. Francisco Guterres Lú-Olo.

Nia haktuir, entre Dekretu Lejizlasaun hirak ne´e, inklui mós Lei Investimentu Privadu ne´ebé oras ne´e iha ona Gabinete Prezidenti Repúblika. Lei Investimentu Privadu ne´e ko´alia kona-ba oinsá atu garante investimentu ne´ebé hala´o individu sira.

Hugo hatutan katak nia mós hato´o informasaun tékniku ba Prezidenti Repúblik hanesan prosesu tranzisaun ba Kuarta Lejizlatura ne´ebé maka rezultadu hos eleisaun parlamentár agora ninian.

“Konsellu Administrasaun ba funsionamentu Parlamentu Nasionál kontinua la´o liuhusi Komisaun Espesialidade Permanente. Maibé, konvokatóriu plenária só bele la´o bainhira iha asuntu importante liu no urjente tanba oras ne´e deputadu sira destakadu hotu ba ida-idak nia eleitór,” nia dehan ba jornalista sira iha Palásiu Prezidénsia Repúblika, Bairu-Pité, Dili, kinta ne´e, hafoin ramata inkontru ho Xefi Estadu Lú-Olo.

Eis jornalista ne´e afirma sei iha transferénsia (hand over) mandatu hosi Terseira Lejizlatura ba Kuartu Lejizlatura ho memória institusionál ida ne´ebé atualizadu liu maka planu estratéjiku Parlamentu Nasionál ne´ebé Parlamentu aprova ona ba tinan lima nian (2017-2022).

(Jornalista: Xisto Freitas, Editor : Manuel Pinto)

 

HUSIK IDA HATÁN