Presiza Investe Maka’as iha Infraestrutura Bee-moos

0
75
Kampaña FRETILIN tipu diálogu ne'ebé hala'o iha salaun UNITAL, Becora. Imajen Ajénsia TATOLI/Xisto Freitas

DILI (TATOLI)–Sekretáriu Jerál FRETILIN, Dr. Marí Allatiri hateten tenki investe maka’as iha infraestrutura ba bee-moos ne’ebé oras ne’e sei hakdasak hela.

Atuál Prezidenti Autoridade Rejiaun Autónoma Espesiál Oe-Cusse Ambeno (RAEOA) ko’alia asuntu ne’e iha kampaña FRETILIN tipu diálogu ne’ebé hala’o iha salaun Universidade Orientál Timor Lorosa’e (UNITAL), Becora, Dili, kinta ne’e. Diálogu refere organiza hosi estudante UNITAL no juventude FRETILIN.

Marí haktuir katak iha kontestu Timor ne’e, bee-moos estraga saugati no husik livre tama tasi tanba la halo jestaun ba bee.

Nia dehan impaktu hosi laiha jestaun ba bee-moos maka afeta ba komunidade hodi la asesu bee-moos no natar barak abandonadu. Nia hatutan Timor nia baze ekonomia maka natar maibé durante ne’e Timor-Leste sempre importa fós tanba infraestrutura ba bee-moos hodi kanaliza bee ba natar limitadu.

Marí rekuñese katak durante ne’e Planu Estratéjiku Dezenvolvimentu Nasionál (PEDN) fó prioridade ba infraestrutura no infraestrutura balun konsege hala’o maibé implementasaun ba polítika infraestrutura maka ladún loos.

“Investimentu ba infraestrutura ita labele nega katak la’o duni maibé implementasaun ba polítika infraestrutura maka tenkiser hadi’a. Pur-ezemplu, ita halo estrada maibé la to’o fulan neen naksobu fali ona. Iha área bee-moos, tanba laiha infraestrutura ba bee-moos, bee estraga saugati, tan ne’e populasaun fatin barak kontinua hakilar falta bee-moos,” nia esplika.

Fundadór ida RDTL ne’e esklarese implementasaun ba polítika infraestrutura ne’ebé di’ak maka tenki iha dezeñu infraestrutura ne’ebé di’ak, iha BOQ ida di’ak, halo estudu no fiskalizasaun ida kompetenti.

“Estrada ita haree nee kabeer maibé laiha kualidade tanba falta estudu jeolójiku no jeohidróliku. Tanba ne’e, presiza iha sentidu responsabilidade no fiskalizasaun ida kompetenti ba obra hirak ne’e atu bele atinji kualidade,” nia informa.

Tuir nia katak ne’e dezafiu boot ba governu foun atu haree kestaun ne’e. Ba Fretilin, nia tenik, ida ne’e sai prioridade atu rezolve bainhira FRETILIN hetan fiar hosi povu hodi lidera Sétimu Governu mai ne’e.

Diálogu ne’e hetan partisipasaun másimu hosi estudante UNITAL ho nia estrutura akadémika, juventude no kuadru sira FRETILIN. Kampaña FRETILIN ba datoluk (22/6) sei hala’o iha Munisípiu Bobonaro ho tipu komísiu (konsentrasaun massa).

(Jornalista: Xisto Freitas, Editór : Manuel Pinto)

HUSIK IDA HATÁN