DILI, (TATOLI) – Prezidente Repúblika (PR), Francisco Guterres Lú-Olo rekuñese komunidade musulmana sira-nia serbisu no kontribuisaun maka’as ba dame, estabilidade, ekonomia no dezenvolvimentu Timor-Leste.
“Ba komunidade musulmana tomak iha Timor-Leste, ha’u hato’o ha’u-nia amizade no konfiansa tomak katak ita-hotu hamutuk sei haburas Timor-Leste ba beibeik no sei habelar liu-tán domin no páz entre ita ema ida-idak no entre komunidade hotu-hotu iha rai ida ne’e”, Lú-Olo hato’o mensajen ne’e bainhira vizita mesquita Annur, Kampung Alor Dili, domingu (25/6) hodi selebra Idul Fitri.
Xefe Estadu hato’o parabéns ho votu ksolok no dame ba komunidade musulmana tomak iha Timor-Leste, Indonézia no iha rai sira seluk.
Tuir Lú-Olo Idul Fitri nu’udar festa espirituál ida ne’ebé hasa’e a’as renovasaun, rekonsiliasaun no dame–kontribui mós ba hakle’an espíritu toleránsia no amizade ne’ebé ita hakarak hametin ba beibeik, iha ita-nia rai doben, entre ita-nia komunidade sira ho relijiaun no fiar oin-oin.
Jornalista: Xisto Freitas
Editora: Rita Almeida
