PR Lú-Olo Nakloke ba Karta no Facebook

0
118
Foto TATOLI

DILI (TATOLI)—Prezidenti da Repúblika Francisco Guterres Lú-Olo fó sai katak, nia parte disponivel atu simu kontaktu liuhosi (via) karta no Facebook ba asunto importante ruma oinsá dezenvolve labarik sira nia futuru.

FOTO TATOLI

“Ohin ha’u hakarak loke kontaktu entre labarik sira no inan aman ho Prezidenti Repúblika kona-ba asuntu importante ruma oinsá dezenvolve labarik sira nia futuru. Prezidenti disponível simu kontaktu direta, via Karta no facebook,” Prezidenti Repúblika Lú-Olo promete kestaun ne’e liuhusi nia deskursu iha komemorasaun Loron Mundiál Direitu Labarik ne’ebé hala’o iha Palásiu Prezidénsia Repúblika, Bairu-Pité, Dili, kinta ne’e.

Francisco Guterres Lú-Olo hateten hamutuk ho nia sei iha prezidénsia ida ne’ebé maka nakloke ba ema hotu liu-liu ba labarik sira.

Basa iha nia komprimisu polítiku no banati ba Konstituisaun atu halo buat ne’ebé nia bele atu tau matan ba labarik sira nia direitu.

Sei koopera ho órgaun soberania sira seluk, liu-liu enkoraza Governu, atu fó atensaun ne’ebé boot ba labarik sira.

Labarik ba Lú-Olo nu’udar futuru Timor-Leste ninian. “Onra boot teb-tebes ba ha’u tanba ohin loron bele hamutuk ho labarik sira hodi selebra loron, Loron Mundial ba Labarik sira,” Lú-Olo fó sai nia sentimentu

Hodi kontinua dehan, “Ba labarik timoroan sira hotu-hotu, ha’u hato’o ha’u nia parabéns.”

Nu’udar xefi Estadu, haksolok liu-tan tanba ohin la’ós selebra de’it Loron Mundiál ba Labarik maibé lansa mós Planu Asaun Anuál ba labarik Timor-Leste nian 2016-2022, dokumentu Ida ne’ebé hatúr Timor-Leste nia komitmentu atu respeita, proteje no promove labarik sira nia direitu.

Agradese ba Komisaun Direitu Labarik sira nian ne’ebé serbisu maka’as hodi hamosu ona Planu Asaun Nasionál ida ne’e.

Iha komemorasaun ne’e, Prezidenti Repúblika fahe ai-oan ba labarik no inan aman sira atu ba kuda nu’udar símblu hatutan tradisaun investimentu hosi beiala sira oinsá promove dezenvolvimentu ida ne’ebé sustentável.

Komemorasaun Loron Mundiál Direitu Labarik ne’e Partisipa hosi Primeiru Ministru, Rui Maria de Araújo ho nia esposa, membru Governu, reprezentante Prezidenti Parlamentu Nasionál, Eis Prezidenti Repúblika, Taur Matan Ruak ho nia espoza, inan aman sira no labarik sira hosi eskola hotu-hotu iha Dili laran.

(Jornalista: Xisto Freitas)

(Editór : Manuel Pinto)

HUSIK IDA HATÁN