PR Lú-Olo Husu Oe-Cusse Oan Tau Matan Ba Irigasaun Tono

0
99
Prezidenti Repúblika ho nia delegasaun vizita Irigasaun Tono. Imajen Ajénsia TATOLI/Xisto Freitas

OE-CUSSE (TATOLI)—Prezidenti Repúblika (PR), Dr. Francisco Guterres Lú-Olo husu ba Oe-Cusse oan sira atu tau matan ba Irigasaun Tono tanba obra ida ne´e folin boot ba Oe-Cusse oan tomak durante tinan naruk.

 “Irigasaun ne´e buat di´ak ida tanba bele asegura ona povu Oe-Cusse sira nia produsaun,” Lú-Olo hato´o kestaun ne´e iha nia vizita ba Irigasaun Tono, Suku Cunha, Sub-Rejiaun Pante Makassar, Oe-Cusse, sesta ne´e.

Irigasaun Tono

Nia haktuir katak produsaun aihan la-hanesan ona iha tinan sira kotuk ne´ebé povu Oe-Cusse seidauk hetan irigasaun. Produsaun ba hare bele tinan ida dala rua no produsaun ba produtu sira seluk bele halo dala tolu iha tinan ida.

 “Ne´e obra ba ita-boot sira hotu atu lori Oe-Cusse oan sira para moris nafatin no moris di´ak liu-tan liuhusi forsa bee ninian ne´ebé iha,” eis komandante gerileiru tenik.

Estudante sira tara tais ba Prezidenti Repúblika hafoin tún iha Aeruportu Internasionál Oe-Cusse.

Irigasaun ne´ebé konstrui hosi Autoridade Zona Espesiál Ekonomia Merkadu Sosiál (ZEESM) ne´e benefísia ba natar hektares 1770 hodi hatán ba família 961 nia presiza, ho bee batak ida ho ás 200m no bee dadoras rua katak ida boot ho naruk 26,5km no ida seluk ki’ik ho naruk 2,6km. Projetu ne´e prontu ona dezde Outubru tinan 2016 liu-ba.

Kona-ba dezenvolvimentu jerál iha Oe-Cusse, Prezidenti Repíblika informa katak to´o iha faze ida ne´e Oe-Cusse aprezenta ninia án liuhusi projetu sira ne´ebé maka halo dadauk diferente oituan.

“Hanesan Prezidenti Repúblika, ha´u foin vizita Oe-Cusse ba dahuluk. Liuhusi klínika, eskola, irigasaun no estrada sira ne´ebé maka ha´u vizita, projetu ida ne´e di´ak teb-tebes no durasaun kualidade to´o tinan 50 no manutesaun rutina kada tinan 5,” nia dehan.

Prezidenti ho nia delegasaun vizita Klínika Espesiál Polivante.

Tuir Prezidenti katak buat seluk ne´ebé importante maka projetu sira ne´e integradu. Laiha ida ne´ebé mesak. Projetu instalsaun kanu bee, fiu no ezgotu sira ne´e sei prontu dala ida de´it atu nune´e ida labele mai sobu fila fali.

Prezidenti ninia programa iha Oe-Cusse maka hanesan loron dahuluk (9/6), vizita estrada urbana pakote I no II, projetu iluminasaun eletrisidade ba sidade Pante Makasar, Jardim Parque Desportiva 20 Juñu, Klínika Espesiál Polivante, Sistema Irigasaun Tono, Hotel Ambeno, Jardin Lifau no Aeruportu Internasinál Oe-Cusse, Sentrál Eletrisidade Inus Sakato,  Konstrusaun  Eskola Bázika 24.

Loron daruak (10/6), Prezidenti Repúblika ho nia delegasaun sorumutu ho konsellu suku hamutuk 18, partidu polítiku no sosiedade sivíl iha Salaun Parókia Numbei, seremónia inaugurasaun Ponte Noefefan.

Prezidenti Repúblika to´o iha Aeruportu Internasionál Oe-Cusse ho aviaun ZEESM iha sesta dader tuku 09:00, simu hosi Prezidenti Autoridade Rejiaun Autónoma Oe-Cusse Ambeno, Dr. Marí Alkatiri ho nia estrutura, autoridade lokál sira, estudante, profesór, forsa seguransa no militár no lia na´in sira. (Jornalista: Xisto Freitas)

 

HUSIK IDA HATÁN