Polísia Tenki Impoen Lei ba Arte Marsiál

0
120
Longuinhos Monteiro

DILI (TATOLI)—Ministru Interiór (MI), Longuinhos Monteiro husu atu Polísia Nasionál Timor-Leste (PNTL) tenki brani impoen lei bainhira aplika lei iha servisu lor-loron nian, liu-liu kualker aktu krime ne’ebé ema halo ligadu ho arte marsial sira.

“Husu atu azekuta lei arma branka, hafoin ita koalia direitu úmanu nian,”  Longinhos Monteiro realsa iha nia nia intervensaun, ohin iha Ótel Ramelau, Komoro, iha sosializasaun lei arma branka.

Tuir lei arma branca nian sei lakondena pessoal sira ne’ebé mak utiliza arma branka ho intensaun di’ak, ezemplu uza katana hodi halo toos ou ba tasi-ai ba nesisidade. Ida ne’e la iha problema, maibé kaer katana tama fali Timor Plaza mak labele tanba ne’e la’ós nia fatin.

Husu atu komandu munisipiu sira, hahú ohin ba oin kontinua sosializa lei arma branka to’o baze atu povu mós bele hatene nune’e la bele ona lori katana malorek de’it.

Ba parte alfándega nian, tenke kontrola didiak sasan kroat sira ne’ebé tama iha Timor, kuandu sira mai ho objetivu faan tenke rejista atu fasil halo fiskalizasaun bainhira iha problema.

Bandu Arte Marsiál

Tuir lei, arte marsial sira ne’ebé la’ós kategoria federasaun arte marsial internasionál hanesan Taekwondo bandu eziste iha Timor, tanba organizasaun arte marsial sira hanesan Setia Hati Terate (SH), Kera Sakti, durante ne’e halo polisia ulun moras no estadu ulun moras.

Tanba ne’e Longuinhos husu atu polísia kontinua halo sosializasaun hodi públiku hatene no kuñese. Nune’e bainhira polísia implementa lei tenki implementa ho rigór.

Governu Hamoos Publisidade Arte Marsiál

Longuinhos Monteiro informa katak, governu liuhosi ministériu interior sei organiza hodi hamoos publisidade arte marsial nian iha teritoriu laran tomak.

“Ministériu Interiór sei organiza ho polísia, forsa armada, Estatal no estudante sira hotu atu tun hodi apaga eskrita arte marsiál nian iha teritoriu nasional,” Longinhos promete.

Kuandu hamoos hotu ona mak ema pinta fila fali iha moru ga fatin saida deit komisaun arte marsial sei aplika sansaun hanesan selu ho valór minimu $50.00 no masimu $500.00.

Enkuantu publisidade arte marsiál ne’ebé bandu mak ema ruma tau iha motor ou kareta, polísia prosesa tuir lei.

(Jornalista : Zezito Silva)

(Editór : Manuel Pinto)

 

HUSIK IDA HATÁN