PJR Informa Situasaun Kriminalidade Ba Prezidenti Repúblika

0
39
Prokuradór Jerál Repúblika, Dr. José Ximenes

DILI (TATOLI)—Prokuradór Jerál Repúblika (PJR), Dr. José Ximenes hala´o primeiru inkontru ho Prezidenti Repúblika, Dr. Francisco Guterres Lú-Olo, hodi informa situasaun kriminalidade iha rai laran ba Prezidenti Repúblika.

“Hanesan ita hotu hatene katak situasaun kriminál iha ikus ne´e sa´e oituan. Iha 31 Maiu, akontese violénsia iha Hatobuilico, Ainaro, ne´ebé kareta rua hetan estragu. Autór sanulu resin ida maka polísia kaptura ona,” Ximenes dehan ba joralista sira iha Palásiu Prezidénsia Repúblika, Bairu-Pité, Dili, tersa ne´e.

Aleinde ne´e, nia informa mós ba Prezidenti kona-ba situasaun konflitu entre juventude iha Bucoli, Baucau, loron hirak liu-ba, ne´ebé uma ida hetan sunu. Polísia konsege kaptura ema na´in sanulu resin tolu no Tribunál Distritál Baucau fó aprezentasaun periodika ba suspeitu hirak ne´e.

Nia hatutan, situasaun iha Kampung Tuti relativamente Bebonuk, Comoro, ne´ebé foin lalais akontese, ema na´in haat maka polísia kaptura no Tribunál mós fó aprezentasaun periodika ba autór sira. Ministériu Públiku (MP) hahú dadauk halo investigasaun ba kazu ne´e.

“Prezidenti Repúblika husu para MP kontinua mantein no halo esforsu para bele kombate krimi sira liu-liu krimi sira ne´ebé akontese bazeia ba jéneru hanesan violasaun seksuál, krimi abuzu seksuál ba menór idade. Funsionamentu Ministériu Públiku la´o normál. Tanba ne´e maka situasaun kriminalidade ne´ebé akontese MP atua kedas,” José Ximenes esklarese. (Jornalista: Xisto Freitas)

HUSIK IDA HATÁN