Pasa Revista, Membru Polísia Hetan Agresaun Fíziku

0
100

DILI, (TATOLI) – Membru Polísia Nasionál Timor-Leste (PNTL) hetan agresaun fízika hosi ema balun bainhira seguransa halo pasa revista iha Kolmera foin lalais ne’e.

“Kareta angguna ida mai, maibé ema balun tur fali iha kapon leten, entaun polísia haruka hapara, sira lakohi no transpota to’o iha Igreja Katedral sorin hafoin seguransa toman, sira baku polisia to’o ulun kanek”, hateten KomJer PNTL, Júlio da Costa Hornai ba jornalista sira iha Kuartel PNTL, Kaikoli, horseik.

Pasa revista ne’ebé halo iha Munisípiu Dili, hosi polísia konsege identifika ema balun lori sasan kroat no dadaun ne’e prende ona motorizada besik 550, enkuantu hosi motorizada ne’e kuandu nain selu koima hafoin bele foti fali.

Komandu PNTL husu ba Timor-oan hotu katak tenke respeita servisu seguransa nia tanba sira ezekuta lei ho ordem, tanba ne’e sidadaun hotu tenke koopera malu karik viola regra tránzitu.

“Karik seguransa sira halo sala ruma iha terenu lalika halo agresaun fízika hasoru sira maibé iha komandu atu ita boot sira hato’o keisa hafoin ami prosesa”, dehan Hornai.

Hornai husu ba sidadaun hotu atu fó liman ba malu hodi kria estabilidade no pás iha ambiente festa demokrásia no ba futuru nasaun ne’ebé tránkuilu.

Enkuantu prosesu agresaun fíziku ne’ebé halo ba polísia, kazu ne’e dadaun iha ona tribunál.

Jornalista: Zezito Silva

Editora: Rita Almeida

HUSIK IDA HATÁN