ParPol Tenke Maturidade Polítika Iha Kampaña

0
39
Partisipante ba paktu unidade nasional. Foto Zezito Silva

DILI, (TATOLI) – Partidu Polítiku (ParPol) tenke iha maturidade durante prosesu kampaña eleisaun parlamentár ne’ebé sei akontese iha loron 20 juñu to’o tempu votasaun loron 22 jullu.
Ministru Interinu, Longinhos Monteiro iha Ministeriu Negósiu Estranjeiru no Kooperasaun (MNEK), Praia dos Coqeiros, ohin (7/6) liuhosi nia intervensaun, bainhira sorumutu ho ParPol sira hodi asina paktu unidade nasionál katak asinatura paktu ne’e atu ParPol sira tenke halo prevensaun ba violasaun eleitorál.

“ParPol tenke uza linguazen ne’ebé di’ak hodi labele insulta malu iha aktu eleitorál no presiza iha maturidade polítika ne’ebé rigorozu atu labele kria instabilidade iha festa demokrasia”, dehan.

ParPol ne’ebé rejistu hamutuk 31 maibé 23 no koligasaun mak sei konkore iha eleisaun lejislativa.

Tuir Longinhos, atu garante estabilidade nasionál presiza ema hotu nia kontribuisaun atu bele estabiliza situasaun iha prosesu kampaña no to’o rezultadu finál.

Atu garante estabilidade iha prosesu eleitorál, Longinhos dehan di’ak liu prevene hahalok aat sira duké kura, nune’e presiza sidadaun hotu tantu ParPol sira nia kontribuisaun di’ak hodi garante unidade nasionál no estabilidade hodi susesu eleisaun ho demokrátiku.

“Eleisaun parlamentár presiza ema hotu nia kontribuisaun hodi la’o di’ak, la’os atu husu festa demokrásia atu fó saida mai ita”, hateten.

Interese estadu tenke tau aas liu, hakarak ema ida idak nian, maibé kuandu iha konfrontu polítiku ruma akontese no fatuk ruma kona polísia, entaun autór sira tenke simu konsekuénsia.

Iha serimonia paktu unidade nasionál organiza hosi Ministériu Interiór no Rede Nasionál ba Prevensaun Konflitu.

Jornalista: Zezito Silva

Editora: Rita Almeida

HUSIK IDA HATÁN