ParPol Admitidu Tenke Konfirma Naran Partidu

0
52
Acilino Manuel Branco. Foto STAE

DILI, (TATOLI) – Partidu Polítiku (ParPol) ne’ebé admitidu (lisensa) hosi Tribunál Rekursu tenke  konfirma naran hosi partidu ida-idak nian tanba balun utiliza lian tetun no portugés.
“Partidu Polítiku ida-idak tenke konfirma naran partidu nian tanba lista ne’ebé tama iha faze inskrisaun balun uza lian tetun no portugés, bele implika buletim votu”, dehan Diretór Jerál Sekretariadu Téknika Administrasaun Eleitorál (STAE), Acilino Manuel Branco iha Tribunál Rekursu Kaikoli, foin lalais ne’e.

Tuir nia, tribunál rekursu halo konfirmasaun hotu ba naran partidu hafoin notifika mai órgaun eleitorál STAE ho CNE (Comissão Nacional de Eleições) hafoin haree preparasaun ba imprimisaun buletim votu.

Hafoin simu notifikasaun, sei konvida reprezentante pontu fokál ba partidu admitidu atu konfirma sigla partidu nian, emblema eh bandeira ne’ebé sei fixa iha buletim votu ho naran ne’ebé loloos.

“Semana oin, ita bolu reprezentante partidu pokítiku atu bele konfirma modelu buletim votu hafoin haruka ba CNE hodi halo aprovasaun.

Enkuantu, planu ba imprimisaun buletim votu sei iha semana tolu nia laran, nune’e iha 11 eh 12 jullu, STAE bele halo distribuisaun buletim votu ba munisípiu 12 inklui Rejiaun Autonomu Enklave Oe-Cusse Ambeno.

Jornalista: Zezito Silva

Editora: Rita Almeida