DILI (TATOLI)–Ofisiál Falintil-FDTL (Força Defesa Nacional) no PNTL (polícia Nacional de Timor-Leste) na’in 19 simu sertifikadu formasaun língua portugeza ne’ebé promove husi IDN (Instituto Defesa Nacional).
Diretór IDN, Donaciano Gomes “Pedro Klamar Fuik” informa katak disente sira ne’e kompostu husi militár na’in sanulu no polísia na’in sia.
“Na’in sia husi komponente terestre, ida husi komponente navál. Para alende husi F-FDTL sira, iha mós ofisiál na’in sia husi PNTL,” diretór IDN ne’e informa ba profisionál komunikasaun sosiál sira, iha auditóriu Ministériu Defeza, Fatuhada, Díli, kinta (29/06).
Nia hateten, ofisiál sira ne’ebé kompleta ona formasaun língua portugeza ne’e fila fali hodi hala’o sira nia kna’ar hanesan babain.
“Ofisiál sira fila ba dezempeña funsaun i aban bainrua iha oportunidade, karik sei iha tan oportunidade hanesan mak sei kursu tan elementár estadu maior,” nia esplika.
Entretantu, formasaun dalen portugés promosaun ofisiál superiór sira hala’o durante tinan ida no formasaun ne’e hala’o ho intensivamente. Kursu ne’e hala’o no dezeña husi IDN.
(Jornalista: Rafy Belo, Editór : Manuel Pinto)
