Move Apoiú Dolár 240 ba Estudante Aprende sai Emprendedór

0
18
Feira emprendedorizmu FEJ, UNTL

DILI (TATOLI)–Empreza Move hosi  Portugal Apoiú  osan hamutuk dolár 240 ba grupu estudante Fakuldade Ekonomia no Jestaun (FEJ), Universidade Nacional Timor Lorosa’e (UNTL) hodi aprende sai emprendedór bazea ba teória ne’ebé aprende iha sala laran, ohin iha kampus FEJ, Resende, Dili.

Vise-dekana asuntu administrasaun no finansa, Bia Carvalho de Jesus informa ba Ajénsia Tatoli, katak osan ne’e fahe ba grupu estudante 24 hodi hola produtu lokál no halo negósiu.

“Ami orienta ona sira produz produtu sira ne’ebé uza duni ita-nia produtu lokál ho forma ne’ebé kreativa nomós inovativa, aproveita matéria prima ne’ebé bele produz fali ba produtu ida,” informa vise dekana Bia Carvalho iha feira emprendedorizmu FEJ, UNTL.

Nia esplika liuhusi atividade ne’e bele forma estudante sira hodi hatene oinsa atu fa’an iha merkadu no ema hola sira-nia produtu.

FEJ, UNTL serbisu hamutuk ho empreza Move hodi haruka sira-nia profesora mai serbisu iha ne’e ho forma voluntáriu hodi halo formasaun ba estudante sira.

Hosi  ida ne’e, bainhira sira la iha karik kapitál (osan) hodi halo negósiu ami fó osan ba sira ho forma kréditu, sira foti hanesan kapitál, fahe ba kada grupu, iha 24 grupu.

“Fahe ba kada grupu dez dolár hodi sira hola sira-nia produtu, depois hotu sira fó fali dez dolár ne’e,” akresenta vise-dekana.

Nune’e mós, vise-dekana ne’e haktuir katak sira mós hanorin teória nomós orienta estudante  halo prátika nune’e bainhira estudante remata sira-nia eskola bele kompete iha merkadu tanba tuir nia, ita-nia nasaun presiza emprendedór barak, se lae ema hosi  li’ur uza hotu oportunidade.

Voluntária Empreza Move, Manuela Vongvong espera ho Apoiú  ne’e estudante sira iha futuru bele sai emprendedór di’ak. “Ami orgullu ho serbisu ne’e,” nia apresia hodi demonstra katak sira sei kontinua Apoiú  estudante sira iha tempu tuir mai.

Entretantu FEJ, UNTL koopera ho empreza Move Portugal hahú iha 2012 ho nune’e kada semester sempre haruka voluntáriu sira mai fó formasaun kona-ba emprendedorizmu  ba estudante FEJ.

(Jornalista: Rafy Belo, Editór : Manuel Pinto)

HUSIK IDA HATÁN