Menus mobiliária eskola EBF Kelikai husu tulun ba ME

0
39
Foto Espesial

DILI, (TATOLI)-Koordenadór Eskola Bázika Filiál Santa Teresinha Kelikai, Autoridade Munisipál Baukau, Postu Administrativu Kelikai, José Valente husu ba Ministériu Edukasaun (ME) atu fó tulun emérjénsia ba eskola tanba daudaun ne’e menus hela mobiliária eskola nia ba estudante sira-nia prosesu aprendizejen.

Eskola ne’e hato’o ona poposta liuhusi Postu Administrativu nian ne’ebé haruka iha 2016 ba Ministériu Edukasaun maibé daudaun seidauk hetan responde ba ezijénsia eskola nian.

“Ami husu karik emerjénsia tanba ami-nia oan sira barak mas meza no kadeira laiha, sira balun hamriik de’it hanesan ne’e”, José informa via telofene, ohin.

Koordenadór ne’e relata eskola  presiza meza no kadeira ba sala haat nian no kada sala sei presiza meza-kadeira hamutuk 30 tuir númeru estudante ne’ebé tuir aprendizajen.

Aleinde ne’e presiza mós atu reabilita eskola tanba kondisaun grave duni no parede sira aat nomós kalen tanba dodok hotu ona.

Hatán ba preokupasaun eskola nian, Vise-Ministra Edukasaun I, Dulce de Jesus Soares hatete meza no kadeira ne’ebé ME sosa iha tinan hirak liubá atu fó ba eskola sira ne’ebé seidauk iha.

“Sé karik eskola ne’ebé iha meza no kadeira ona, ita sei lafó. Ha’u lahatene tanba iha proposta barak mak tama ami bele kontinua haree filafali proposta sira ne’e maibé hakarak hatete meza no kadeira ne’e ita sosa atu fó ba eskola sira ne’ebé laiha, maibé akontese iha eskola balun iha tiha meza no kadeira tuan hakarak troka ho foun”.

Nune’e, ME halo filafali servisu ida atu haree katak iha eskola balun sala nakonu ho meza no kadeira maibé tuan, entaun tenke halo jestaun ida atu haree kaundu eskola ida iha kadeira liu tenke foti fó fali ba eskola ne’ebé mak laiha.

“Ita la’ós atu sosa kadeira foun maibé ami tenke halo jestaun kuadru pesoál, tanba dalabarak iha fatin balun dehan profesór laiha maibé tanba laiha jestaun ba profesór sira ne’e. Tuir rejime karreira profesór, nia tenke hanorin 24 oras pur semana. Saida mak akontese, iha eskola balun  la’ós profesór hotu hanorin hanesan ne’e maibé ema laheten dehan profesór lato’o, problema mak lajere de’it profesór nia oras”.

Ba meza no kadeira, profesór sira, ME agora halo esforsu boot ida atu hadi’a jestaun ba kestaun sira ne’e.

Sobre Ezijénsia eskola bázika filiál Santa Teresinha de Quelicai, Vise-Ministra dehan, diretór edukasaun iha fatin ne’ebá mak tenke iha responsabilidade atu hato’o ba ME ba asuntu hanesan ne’e.

(Jornalista : Maria Auxiliadora)

(Editor : Manuel Pinto)

HUSIK IDA HATÁN