MEKAE Ohin Aprejenta Nota Informativa Pelican Iha KM

0
121
Reuniaun Konsellu-Ministru, ohin. Foto GPM

DILI (TATOLI)-Ministru Estadu, Koordenadór Asuntu Ekonómiku (MEKAE), Estanislau Aleixo da Silva ohin aprejenta nota informativa kona-bá Pelican Paradise iha Konsellu Ministru (KM) hodi kontinua asina akordu espesial investimentu iha semana hirak tuir mai ne’e.

Estanislau Aleixo da Silva informa katak, Pelican Paradise mai investe iha Timor-Leste ho montante osan millaun U$310 no Governu Timor-Leste latau orsamentu ruma iha investimentu refere.

“Akordu investimentu Pelican Paradise asina ho Governu Timor-Leste, iha inisiál ba tinan 50 depois iha posibilidade renova tan mais de tinan 50,” Ministru Estanislau dehan tuir iha Palásiu Governu.

Hodi kontinua esplika katak, iha reuniaun Konsellu-Ministru nian, ohin, 27 Juñu 2017, MEKAE halo aprezentasaun pontu situasaun Pelican Paradise nian no lori nota informativa ida sobre asuntu balun ne’ebé Governu tenke hatene atu nune’e bele avansa ba redasaun finál akordu espesiál investimentu nian.

Tuir nia Negosiasaun durante ne’e la’o di’ak tebes no partisipasaun di’ak tebes husi liña ministeriál sira no agora to’o ona etapa ida ké atu asina akordu espesiál invesimentu, hein katak semana ida hanesan ne’e hotu ona no hein semana seluk Primeiru-Ministru konvoka Konsellu-Ministru ida para hola desizaun depois nia  (Estanislau) bele asina akordu espesiál investimentu iha Pelican Paradise.

Pelican Paradise ne’e servisu ida intergradu ho ministériu hotu-hotu no koodenasaun husi MEKAE no serbisu ne’ebé importante tebes mak Terras no Propriedade, Ministériu Justisa, Minstériu Obras Públikas, Transporte no Komunikasaun ne’ebé pratikamente finalizadu ona.

Agora iha de’it desizaun ida kona-ba Konsellu-Ministru sei hola mak kona-ba osan arredamentu nian, tinan-tinan ne’e hira? Konsellu-Ministru mós ohin konkorda ona atu halo konstrusaun pur faze, tanba sei lahalo dala-ida de’it.

Faze dahuluk mak sei halo liuliu ba office building, depois konstrusaun otél nian no halo reflorestamentu iha foho lolon no haree mós ba parke públiku ida ne’ebé Estadu mak sei haree maibé kompañia prontu atu ajuda no dezeñu.

Bainhira investimentu ne’e hahú sei loke dalan maka’as ba investimentu esternu mai Timor laran tanba nia la’ós emprezáriu ki’ik maibé boot no la’ós ida mesak de’it, sira hamutuk 12 mak atu halo dezenvolvimentu ida ne’e.

Obras ba Pelican Paradise ne’e kuandu buat hotu la’o di’ak, antes tinan 2017 ne’e remata kompañia sei hahú ona obra ne’ebé dezeñu halo husi kompañia rasik.

Pelican prontu ona atu avansa, hein de’it desizaun finál husi Governu para asina akordu investimentu.

(Jornalista : Maria Auxiliadora, Editór : Manuel Pinto)

HUSIK IDA HATÁN