Lú-Olo Husu Líder Parpol Uza Liafuan Mamar iha Kampaña

0
17
Prezidenti Repúblika, Francisco Guterres Lú-Olo. Imajen Mídia PR

DILI, (TATOLI) – Prezidente Repúblika, Francisco Guterres Lú-Olo husu ba líder partidu polítiku (Parpol) sira atu uza liafuan mamar ba malu iha kampaña parlamentár ne’ebé sei hahú iha 20 Juñu.

Prezidente hato’o kestaun ne’e liuhusi ninia deklarasaun eskrita ne’ebé Xefe Kaza Sivíl Prezidénsia Repúblika, Francisco de Vansconselhos lee iha eventu Konsertu ba Páz ne’ebé organiza hosi Departementu Justisa no Paz Dioseze Dili iha Lecidere, Dili, 17 juñu ne’e.

Tuir Prezidente Lú-Olo líder partidu polítiku sira maka tenke sai promotor ba pás no estabilidade. Nia hatutan situasaun hotu-hotu ne’ebé akontese iha Timor sai nu’udar lisaun boot ba líder sira atu hateke ba oin hodi lori dezenvolvimentu mai povu no Nasaun.

Okaziaun ne’e, nia mós husu militante partidu sira labele uza ID falsu iha facebook hodi insulta ema, tanba ne’e la’ós sidadaun ne’ebé di’ak no responsável. Sidadaun ida di’ak maka hatudu responsabilidade hodi asegura pás no estabilidade.

“Ha’u mós husu ba inan aman, bin no maun alin sira atu vota ho konsiénsia hodi hili partidu ida ne’ebé maka programa di’ak para garante povu bele moris di’ak ba beibeik iha aban bainrua”, sujere eis komandante gerileiru.

Jornalista: Xisto Freitas

Editora: Rita Almeida

HUSIK IDA HATÁN