Lú-Olo ho Governu Sei Review Lei Kódigu Sivíl

0
84
Reprezentante Igreja Protestante iha Timor-Leste, Rev. Lourenço dos Santos ko´alia ba jornalista sira iha Palásiu Prezidénsia Repúblika, tersa ne´e. Imajen Ajénsia TATOLI/Xisto Freitas

DILI (TATOLI)—Prezidenti da Repúblika Francisco Guterres Lú-Olo, promete katak, sei hamutuk ho governu atu haree lei kódigu sivíl, liu-liu artigo 1475 ne’ebé la rekuñese kazamentu sivíl hosi relijaun Protestante, Islam, Budha no Hindu, maibé rekuñese de’it kazamentu sivíl Katoliku.

Xefi estadu Timor-Leste afirma promesa ne’e, bainhira simu preokupasaun hosi Reprezentante Igreja Protestante iha Timor-Leste, hanesan Igreja Evangélica Asembleia de Deus no Konsellu Nasionál Izlámiku Timor-Leste, iha palasio Prezidente, Bairo Pite, Tersa (06/06).

Iha sorumutu ne’e parte protestante ho Izlámiku hato´o sira nia preokupasaun ba Prezidenti Repúblika, Dr. Francisco Guterres Lú-Olo kona-ba Lei Kódigu Sivíl artigu 1475 ne´ebé ignora sira, tanba rekuñese katóliku de´it maibé la rekuñese parte protestante no izlámiku.

“Dadus ne´ebé ami iha katak família ida ba trata Sertidaun Kazamentu iha Ministériu Justisa, sira (pesoál Ministériu Justisa) fó karta ida katak la simu tanba la´ós katóliku. Bazeia ba ida ne´e maka ami hamutuk halo diskusaun ida ba lei ne´e atu altera,” portavóz hosi reprezentante relijiaun ne´ebé temi iha leten, Rev. Lourenço dos Santos hosi Igreja Protestante Timor-Leste ko´alia ba jornalista sira iha Palásiu Prezidénsia Repúblika, Bairu-Pité.

Lourenço informa katak sidadaun Timor ne´ebé relijiaun protestante tanba lei ne’e prezudika durante ne’e sempre troka fali sira nia Sertidaun Batizmu ba versaun katóliku iha Portugal bainhira atu ba serbisu iha Ingleterra.

Nune’e nia sujere atu altera Lei Kódigu Sivíl artigu 1475, atu bele fasilita sira hodi trata sira nia dokumentu.

(Jornalista: Xisto Freitas)

(Editór : Manuel Pinto)

HUSIK IDA HATÁN