Lú-Olo Hakarak Suai Nakfilak ba Fatin Turístika

0
189
Prezidente Repúblika, Francisco Guterres Lú-Olo iha abertura konferénsia Dezenvolvimentu Sustentavel (ODS) ne'ebé hala'o iha Sentru Konvensaun Dili. Foto António Goncalves

KOVALIMA (TATOLI)—Prezidente Repúblika, Francisco Guterres Lú-Olo’ hatete, bainhira Suai nakfilak ba fatin turístika ida Timor bele justifika liután rezultadu investimentu boot hanesan Aeroportu Internasionál Komandante- em Chefe das Falintil Kay Rala Xanana Gusmão.

“Aeroportu ne’e bele hasa’e liután Timor-Leste nia kontaktu internasionál maibé investimentu ne’e boot tebes nune’e importante mós halo atividade sira seluk la’o ho di’ak hanesan setór turizmu. Bainhira Suai nakfilak bá fatin turístiku ida . Ita bele justifika liután aeroportu ida ne’e,” Prezidenti Lú-Olo katak iha nia intervensaun hafoin inaugura Aeroportu Komandante- em Chefe das Falintil Kay Rala Xanana Gusmão, Suai, Tersa (20/06).

Tuir Lú-Olo bainhira Timor haburas mós turizmu istória kulturál nasionál no internasionál iha rejiaun ida ne’e

Sei foti aas tebes memória mártir sira ne’ebé mate ba país no rejiaun ida ne’e.

Xefi Estadu ne’e observa mós katak, investimentu boot ida ne’e iha Kosta Súl , ezije kapasitasaun bá ema Timor tenke investe liután iha rikusoin murak no rekursu umanu hodi haree ba époka globalizasaun ne’ebé hasoru ohin loron ho kompetisaun aas tebes.

Dezenvolvimentu Kosta Súl ezije atu kapasita didi’ak ema, tuir planu di’ak ida atubele iha kualidade aas. Nune’e Nia fi’ar katak timoroan hotu hatán malu kona-ba dezenvolvimentu Kosta Súl nian.

Kosta Súl fatin ne’ebé iha ona projetu Tasi Mane no sai hanesan “fronteira foun” ba Timor-Leste ne’ebé nakonu ho rikusoin naturál oioin ho populasaun ladún boot, maibé iha rai bokur liu ba agrikultura no mós minarai.

Nune’e bainhira harii infraestrutura boot sira iha Kosta Súl, hatudu katak Timor hakat daudaun ona atu konstroe, atu harii infraestrutura iha Timor-Leste no loke dalan bá dezenvolvimentu no importante iha kompleksu aeroportuáriu ida hanesan iha Suai.

Aeroportu internasionál Suai konstroe ho montante osan millaun U$67 no sei lori tempu atu fó retornu atu osan ne’e filafali ba kofre Estadu nian, maibé inportante liu mak aeroportu Suai sei hasa’e liután sidadaun nia mobilidade liu-liu ligasaun entre populasaun Kosta Norte nian no populasaun Kosta Súl nian sei lais liután.

(Jornalista : Maria Auxiladora, Editór : Manuel Pinto)

HUSIK IDA HATÁN