Loron Mundiál Labarik Taur Selebra ho Labarik Defisiente

0
53
Eis-Prezidente Repúblika Timor-Leste, Taur Matan Ruak ho nia espoza Isabel Fereira komemora loron mundiál ho labarik defisiente besik 50 iha kongregasaun Madre ALMA, ohin iha Comoro. Foto Tatoli/ Zezito Silva

DILI (TATOLI)–Eis-Prezidenti Repúblika Timor-Leste, Taur Matan Ruak ho nia espoza Isabel Fereira ohin, Kinta (01/06) hamutuk ho  labarik defisiente nain 50 resin komemora loron mundiál ba labarik iha kongregasaun Madre ALMA, iha Comoro.

Iha selebrasaun ne’e Taur Matan Ruak sente triste basa kondisaun labarik sira nian, la iha nutrisaun ne’ebé di’ak.

“Ha’u sente triste ba labarik sira ho defisiente ne’ebé iha kongregasaun Madre ALMA maibé sente mós kontente tanba sira sensibilizadu ona maibé labarik sira balun sei ho nutrisaun ladiak,” Taur Matan Ruak haktuir ba jornalista hafoin halo vizita ba labarik defisiente sira.

Ho kondisaun  ne’ebé iha, Taur husu ba governu no instituisaun estadu hotu atu kontinua tau matan ba labarik sira, hahú hosi aldeia, suku ho familía atu tau matan ba oan sira.

“Labarik sira hanesan aifunan ne’ebé rega loroloron sei buras, maibé kuandu la rega aifunan sei namlaek no maran,” Eis Jeneral ne’e kompara.

Hodi enkoraja katak, mudansa mundu mai hosi ema, nune’e inan, aman, familía, autoridade lokál, munisipál no sentrál tenke tau atensaun makas ba labarik sira, liu-liu hetan edukasaun, ho edukasaun mak lori matenek hodi bele muda mundu.

Matenek mak sei muda mos  nasaun, no lori matenek mak muda familía no muda ida-idak nia moris.

tanba ne’e estadu no nasaun tenki fo atensaun ba Labarik sira hotu tantu sira defisiente, atensaun liu-liu mak área edukasaun no Saude iha parte mal nutrisaun atu ba futuru Timor-Leste moris di’ak liu tan.

(Jornalista: Zezito Silva)

(Editór : Manuel Pinto)

 

HUSIK IDA HATÁN