Lisensa ba kampaña PM Rui sei konsulta ministru kordenador

0
116
Primeiru Ministru (PM) Rui Maria de Araújo

AILEU (TATOLI)- Primeiru Ministru Rui Maria de Araújo seidauk deside loloos atu foti lisensa hodi partisipa ba atividade kampaña partidu Politiku Fretilin durante eleisaun parlamentár, tanba sei konsulta ho ministru kordenador sira.

“Ba ha’u nia aan rasik seidauk  determina bainhira mak foti lisensa tanba sei koordena ho ministru koordenadór sira, se ha’u sai sira labele sai, se sira sai ha’u labele sai atu nune’e bele asumi koordenasaun governu nia nafatin,“ PM Rui ba Jornalista sira iha Aileu, Sábadu foin lalais ne’e.

Iha sorin seluk, Rui promete katak, sei kontinua asegura funsionamentu servisu administrasaun públika iha ministériu hotu.

Tanba ne’e, nu’udar xefi do governu, husu ministériu ida labele husik mamuk kedas, se ministru  husu lisensa atu ba kampaña tenke koordena ho vise-ministru ka sekretariu estadu atu labele sai hotu kedas hodi superviziona servisu administrasaun.

Nune’e mos, diretór jerál no estrutura mós iha obrigasaun atu asegura funsionamentu servisu instituisaun estadu.

Oras ne’e dadaun, membru governu ne’ebe hatama ona lisensa ba kampaña Ministru turismu arte no kultura Francisco Kalbuady Lay.

Kalbuady lisensa la ho vensimentu durante fulan rua hahú juñu to’o jullu hodi partisipa kampaña.

Biar nune’e, ba membru governu ne’ebe la lisensa, tuir lei sira iha direitu atu tuir atividade polítika iha loron Sábadu no Domingu no tempu feriadu.

(Jornalista:Agapito dos Santos)

(Editór : Manuel Pinto)

 

HUSIK IDA HATÁN