Lion Air Hakarak Hala’o Atividade Komersiál Iha Timor-Leste

0
580
Aviaun Lion Air. Foto/Google.

DILI, (TATOLI) – Diretór Ezekutivu Servisu Rejistu no Verifikasaun Emprezariál (SERVE), Florêncio Sanches informa kompañia nasionál Indonézia, Lion Air hakarak atu hala’o atividade negósiu komersiál iha Timor-Leste hodi halo operasaun ba ligasaun Dili-Kupang no Jakarta.

Iha semana kotuk, reprezentante embaixadór Indonézia iha Timor-Leste lori ona emprezáriu aviasaun Lion Air nian hodi halo sorumutuk ho SERVE no antes hala’o atividade komersiál, kompañia ne’e mós hasoru malu ona ho Aviasaun Sivíl Timor-Leste ne’ebé fó ona lista rekezitu atu halo resjistu komersiál iha SERVE atu sai entidade legál iha Timor-Leste depois bele halo operasaun.

“Sira dehan Lion Air liga ba Indonézia iha poténsia boot tebes no iha ne’e iha merkadu ida ne’ebé agora forte tebes liuliu indikasaun sira hatudu katak iha eleisaun foin daudaun Timor-Leste susesu no laiha buat ida, nomós ita utiliza moeda dólar Amérika, nune’e atrai sira”, Florêncio dehan iha Matadouru, ohin.

Sobre rute ne’ebé kompañia aviasaun ne’e foti katak sira sei halo presu ne’ebé mak kompetitivu tebes ne’ebé lahanesan ho presu agora no kustu husi rute ne’e lahanesan kuandu diretamente bá Bali tanba pasejeiru tuun iha Kupang hafoin kontinua destinasaun bá fatin seluk no timoroan sira ne’ebé sai bá rai-liur liuhusi Kupang bele halo connecting fly ba área ne’ebé de’it.

“Ne’e hatudu katak investór husi rai-liur komesa nota ona iha buat pozitivu iha rai ida ne’e, no sira kontente tanba semana ida ne’e sira rejista gratuita no lalais no lahan tempu naruk kompara ho nasaun seluk ne’ebé sira halo negósiu ba”.

Florêncio hatutan kuartu aéreo ne’ebé Timor-Leste fó sei mamuk no iha akordu entre Governu Timor-Leste no Indonézia atu fasilita aviaun semo mai no Timor-Leste bainhira iha aviaun fasilita atu semo ba.

“Problema ida mak ita simu de’it maibé seidauk iha planu ida atu harii mós aéreo nasionál no iha ona proposta balun ne’ebé tama mai no ha’u sei entrega diretamente ba Governu para oinsá ita estabelese aéreo nasionál. Se aéreo nasionál ne’e iha, ita iha mós oportunidade atu kuartu mamuk ne’ebé ita atu utiliza mak bá Indonézia, Singapura no Austrália tanba ita sei fornese sira ho zerro no sira fornese mai ita”.

Kona-ba dokumentu sira ne’ebé daudaun ne’e kompañia trata porsentu 100 loos ona. “Primeiru star mak ida ne’ebé atu tama mai ne’e, ida husi Jakarta ho Kupang ninian no sira husu tempu fulan ida atu halo buat hotu loos para mai ne’e labele sala tan.

Jornalista: Maria Auxiliadora

Editora: Rita Almeida

HUSIK IDA HATÁN