LFA no SEJD Sei Realiza Jogu Segunda Époka

0
71

DILI (TATOLI)—Órgaun Liga Futeból Amadora (LFA) no Sekretaria Estadu Juventude no Desportu (SEJD) sei realiza jogu primeira divizaun ba segunda volta ba époka segunda nian.

Jogu primeira divizaun ba segunda volta ba époka segunda sei realiza hafoin LFA no SEJD prosesa hotu klubu sira nia direitu kona-ba prémius ba kada jogu, orsamentu ba dezlokasaun, reseitas hosi billhetes nomós subsídiu ne’ebé durante ne’e atrazu iha jogu hotu ne’ebé hala’o iha primeira volta.

Informasaun ida ne´e Ajénsia TATOLI asesu hosi Mídia LFA iha tersa ne´e no konfirma katak desizaun ida ne´e fó sai bazeia ba inkontru entre estrutura LFA no prezidenti klubu sira hosi primeira divizaun ninian ne´ebé hala´o iha D’City Hotel, Vila Verde, Dili, 02 Maiu 2017.

Iha reuniaun ne´e, LFA no SEJD mós sei mantein nafatin desizaun anterior ba jogu sira ne´ebé hala´o iha Maliana. LFA ho SEJD hanoin hela meius oi-oin atu jogu iha Maliana bele hetan antusiazmu hosi adeptu sira.

“Agora LFA organiza mídia sira inklui rádiu komunidade iha Maliana nomós autoridade iha munisípiu refere atu fahe informasaun kona-ba jogu segunda volta, tantu iha Dili nomós Maliana. Meius seluk ne´ebé LFA sei halo maka sei hola TOA tau iha kareta LFA atu bele avizu ba komunidade sira loron ida antes jogu hahú,” haktuir informasaun ne´e.

LFA mós sei serbisu ho autoridade sira iha Maliana hanesan F-FDTL, PNTL, Bombeiros no Autoridade Munisípiu atu prepara transportes ba komunidade no adeptu sira atu bele asisti jogu.

(Jornalista: Xisto Freitas)

(Editor : Manuel Pinto)

HUSIK IDA HATÁN