Kooperativa Estudante Kontribui Reseita ba Estadu

0
80
Vise-dekana asuntu administrasaun no finansa, Bia Carvalho de Jesus

DILI (TATOLI)-Vise-dekana asuntu administrasaun no finansa, Bia Carvalho de Jesus informa, Fakuldade Ekonomia no Jestaun (FEJ) Universidade Nasionál Timor Lorosa’e halo parseria ho empreza Move, Portugal konsege forma estudante sai emprendedór, liuhosi kooperativa.

Husi grupu kooperativa estudante barak ne’ebé FEJ forma, grupu rua mak susesu. Susesu ne’e tanba harii kooperativa liuhusi harii kantina ne’ebé hanaran kantina “De Graça” hamutuk rua besik fakuldade rasik no seluk mak grupu estudante hetan oportunidade husi kámara komérsiu hodi hetan kreditu.

“Sira-nia rendimentu ne’e sira tau iha kooperativa no restu fahe. Mai fakuldade, hetan de’it mak aluger kada fulan sira fó 50 dolár. Kantina rua, ami simu cem dolár kada fulan no entrega hotu ba diresaun reseita hodi hatama ba kofre estadu,” Bia Carvalho de Jesus informa ba TATOLI iha nia servisu fatin, horseik.

Ho susesu ne’e, Bia Carvalho de Jesus hateten, nu’udar edukadór, sira-nia parte apresia ho rezultadu ne’ebé iha tanba estudante sira bele implementa teória ba iha prátika.

“Sente kontente tebes tanba estudante sira bele aplika ona teória sira ne’ebé durante ne’e sira aprende,” nia apresia.

Hodi reforsa mós katak ho ezisténsia kantina ne’e bele sai mós fatin prátika nian ida ba estudante sira iha prosesu aprendijazen.

“Sira halo serbisu rotativa no kada estudante hetan oportunidade hodi aprende no halo atividade emprendór nian,” nia hakotu.

(Jornalista: Rafy Belo, Editor : Manuel Pinto)

 

 

HUSIK IDA HATÁN