Konstrusaun Edifísiu IDN Sei Gasta Milaun Atus Ida Resin

0
392
Dezeñu Futuru Instalasaun IDN

DILI, (TATOLI) – Prezidente Ezekutivu konsultór PT Perentjana Djaja, Bambang H. Wikanta informa katak planu orsamentu ba konstrusaun edifísiu IDN (Instituto da Defesa Nacional) sei gasta millaun atus ida resin.

Ministru Obra Públika, Transporte no Komunikasaun, Gastão de Sousa. Foto Tatoli: Rafy Belo

“Maizmenus millaun atus ida tolu nulu resin tolu rihun atus lima doláres (133.500.000 USD)”, informa prezidente ezekutivu husi Konsultan Indonézia ne’e hafoin halo aprezentasaun dezeñu, futuru instalasaun edifísiu IDN, ohin iha IDN, Palásiu Governu, Díli.

Planu orsamentu ne’e sei aloka ba implementasaun konstrusaun inklui mobiliáriu sira.

“Konstrusaun edifísiu kompostu husi arkitetu, estrutura (leten no karaik), mechanical electrical (plumbing, eletrisidade) nomós mobiliáriu sira”, informa tan.

Planeamentu projetu ne’e la’ós fásil tanba la’ós de’it edífisiu aas maibé kompostu husi edifísiu barak no fatin ba implementasaun planu ne’e mós rai lolon.

Nune’e, nia rezultadu sei di’ak tebes, optimál no posibilidade interasaun entre edifísu ida ba edifísiu seluk, sei di’ak tebes. “Ami nu’udar konsultór planeamentu, prontu atu apoiu dezenvolvimentu ne’e”, akresenta.

Ministru Obras Públikas, Transporte no Komunikasaun, Gastão de Sousa hateten dezeñu ne’e prosesu di’ak tanba koordenasaun di’ak entre ADN (Autoridade Nacional de Desenvolvimento) ho obras públikas.

“Purtantu rezultadu ba obras públikas profundu, agora ita hein oinsá atu implementa”, realsa. Hodi esplika planu orsamentu ba konstrusaun ne’e boot, tenke fahe no sei konstrui fazeadamente, haree ba nessesidade saida mak mak institutu ne’e presiza, husi tinan ba tinan.

Labele halo buat hotu dala ida, depois halo treinamentu ba ema na’in 10 ka 20. Fazeadamente, presiza edifísiu prinsipál ho fasilidade ne’ebé bele fó apoiu hodi institutu ne’e bele la’o, maibé sei rekomenda ba governu foun tanba agora iha faze kampaña no eleisaun.

“Ne’e duni ita sei rekomenda atu fó atensaun mós institutu ida ne’e”, governante ne’e realsa.

Ministru akresenta kondisaun edifisiu atuál la permite atu halo formasaun ba ofisiál sira. Tanba ne’e, importante no espera tempu badak sei rekomenda ba governu hafoin lori ba Konsellu Ministru para aprova.

Iha fatin hanesan, Ministru Defeza, Cirilo Cristovão hatutan prosesu finalizasaun dezeñu ona, tuir mai sei liuhusi avaliasaun, verifikasaun, konsultasaun depois mak deside.

“Independente governu se mak ukun ne’e povu mak sei determina maibé investimenntu ba rekursu umanu, governu se de’it mai mós sei kontinua nafatin”, konklui.

Entretantu, introdusaun planu atu harii edifisiu IDN hahú iha 2014 no sei harii iha Tibar, Kaiteuhu, Munisípiu Liquiça.

Jornalista: Rafy Belo

Editora: Rita Almeida

HUSIK IDA HATÁN