Konstrusaun Aeruportu Internasionál Oe-Cusse Finaliza iha Outubru 2018

0
187
Prezidenti Repúblika, Dr. Francisco Guterres Lú-Olo akompaña hosi Majór Jenerál Lere Anan Timur, membru Parlamentu Nasionál no reprezentante Kompañia WIKA hala´o vizita ba Aeruportu Internasionál Oe-Cusse hodi haree progresu konstrusaun hosi aeruportu refere. Imajen Ajénsia TATOLI/Xisto Freitas

OE-CUSSE (TATOLI)—Konstrusaun Aeruportu Internasionál Oe-Cusse sei ramata iha Outubru 2018. Aeruportu ne´ebé konstrui hosi kompañia Indonézia WIKA (Wijaya Karya hahú iha tinan 2015 liu-ba ne´e ho luan  hektares 600 no run way (fatin ba aviaun tún/take off landing) nia naruk metru 2500 no luan metru 60.

Prezidenti Repúblika kaer liman ho kontratór sira ne´ebé kaer konstrusaun Aeruportu Internasionál Oe-Cusse.

Jestór Kompañia WIKA (Wijaya Karya), Dani Irawan esplika orsamentu ba konstrusaun obra ne´e ho montante milaun dólares amerikanu 119.

“Kompañia la hasoru obstáklu durante halo konstrusaun ba aeruportu ne´e,” Dani dehan ba jornalista sira hafoin simu Prezidenti Repúblika, Dr. Francisco Guterres Lú-Olo ho nia delegasaun ne´ebé vizita aeruportu internasionál ne´e iha Palaban, Suku Costa, Postu Administrativu Pante Makasar, Oe-Cusse, sesta ne´e.

Kontratór ida esplika progresu Aeruportu Internasionál Oe-Cusse ba Prezidenti Repúblika ho nia delegasaun.

Oras ne´e, nia haktuir, kompañia foku ba konstrusaun iha área sira hanesan fatin ba air site (isi udara), run way, terminál ba pasajeiru, fire figthing (pemadam kebakaran) no fatin ba rezerva kombustível. Konstrusaun ba obra hirak ne´e avandu tebes no besik atu ramata.

Iha fatin hanesan, Prezidenti Repúblika, Dr. Francisco Guterres Lú-Olo hateten katak aeruportu ida ne´e sei halo Oe-Cusse ka Timor-Leste sei sai di´ak tanba iha futuru aeruportu refere sei halo konesaun Voo (penerbangan) ba iha Indonézia, Singapura, Austrália no nasaun sira seluk. Aviaun boot sira hanesan Boeing 737 no Boeing Business Jet or Airbus’s A320 bele tún iha aeruportu refere. (Jornalista: Xisto Freitas)

 

HUSIK IDA HATÁN