Konsellu Imprensa Apresia Desizaun Tribunál ba Kazu Denunzia Kalunioza

0
73
Situasaun depois julgamentu ba kazu Raimundo Oki, ohin iha Tribunál Distritál Dili. Foto Tatoli

DILI, (TATOLI) – Membru Konsellu Imprensa, Hugo Fernandes apresia ba desizaun ne’ebé Tribunál Distritál Dili fó sai ohin, absolve (livre hosi akuzasaun) jornalista Raimundo Oki ho ninia eis diretór jornál diáriu Timor Post, Lorenço Martins ba kazu denúnzia kalunioza ne’ebé komete hasoru eis asesór Ministériu Finansa, Rui Maria de Araújo.

“Konsellu Imprensa desde ínisiu fiar katak lei Komunikasaun Sosiál ne’ebé vigora tenke tama teste ida, kazu ne’e tama ona ba teste e ita kontente tanba autór judisiariu sira komprende no aplika didiak  lei komunikasaun sosiál”, dehan Hugo Fernandes ba jornalista sira, ohin iha Tribunál Distritál Dili.

Kazu ne’e akontese bainhira jornalista Raimundo Oki hakerek notísia ho tittlu “Deskonfia eis asesór MF “fó projetu” ba kompañia Indonézia” ne’ebé públika iha loron 10 novembru 2015, pajina 14.

Hosi publikasaun ne’e, parte redasaun rekoñese mosu erru e halo koresaun no husu diskulpa ba lezadu, atuál Primeiru Ministru.

Durante lé desizaun finál, juiz Patrocínio Antonino husu atu labele komete tan erru nomós toma atensaun antes publikasaun.

Rona desizaun ne’e, parte ministériu públiku utiliza direitu atu halo rekursu.

Ekipa Redasaun

HUSIK IDA HATÁN