Komunidade Bobonaro Antusiaz Ba TRO

0
63
Ambiente kompetisaun TRO durante loron haat (30 Maiu-02 Juñu 2017) iha Jináziu Maliana, Munisípiu Bobonaro. Imajen espesiál.

DILI (TATOLI)—Turnament Regional Open (TRO) ne´ebé maka organiza hosi Federasaun Boxing Amadora Timor-Leste (FBATL) iha Jináziu Maliana, Munisípiu Bobonaro, durante loron haat (30 Maiu-02 Juñu 2017), hetan antusiazmu maka´as hosi komunidade Munisípiu Bobonaro hahú hosi loron primeiru to´o ramata.

Komunidade Aldeia Lepo, Suku Tapo Memo, Postu Administrativu Maliana, Munisípiu Bobonaro, Sabino Moniz hateten durante Timor ukun án foin primeiravez eventu boxing realiza iha Maliana, tanba ne’e nia senti haksolok.

Nia husu ba Asosiasaun Boxe Bobonaro atu bele akumula joven barak, nune’e bele lori treinu boxe.

Iha fatin hanesan, komunidade Aldeia Cossal, Suku Saburai, Postu Administrativu Maliana, Munisípiu Bobonaro, Maria Soares subliña katak eventu boxing parte di´ak ida ba joven sira hodi hatudu sira nia forsa iha ring leten, para iha futuru joga di´ak bele lori nasaun nia naran ba partisipa iha eventu internasionál.

Nune´e mós, joven ida hosi Aldeia Lepgen, Suku Tapo Memo, Postu Administrativu Maliana, Munisípiu Bobonaro, Zaquiel de Jesus, apresia ba Federasaun Boxe Amadora Tinor-Leste (FBATL) tanba lori ona eventu ne’e mai anima sira, ne’e duni hanesan joventude, nia senti kontenti tanba aleinde asisti, nia mós bele hetan esperiensia hosi ne’e.

Ana Soares, joven ida hosi Aldeia Marabia, Suku Holsa, Postu Administrativu Maliana, Munisípiu Bobonaro, senti haksolok tanba bele asisti hodi apoiu hakilar bainhira haree boxista sira tuku malu iha ring leten.

Tanba ne’e, nia husu ba juventude Maliana ne´ebé gosta halo problema iha públiku, di´ak liu aprende boxe para tuku malu iha ring leten hodi hetan naran no buat seluk. (Jornalista: Xisto Freitas)

 

HUSIK IDA HATÁN