Kompañia Kuaze 50 Seidauk Rejista iha SERVE Tanba Hasoru Difikuldade

0
57
Lansamentu Abertura Seminariu Estabelese SERVE iha loron Tersa 06 Juñu 2017 iha Salaun Paroque Numbei ne’ebé hetan prezensa husi Prezidente RAEOA, Mari Alkatiri, no Diretór SERVE, Florêncio Sanches. Foto ZEESM

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches informa kuaze kompañia 50 mak daudaun ne’e investe no halo negósiu iha Rejiaun Administrativa Espesiál Oecusse-Ambeno (RAEOA) eidauk rejista iha SERVE tanba hasoru difikuldade.

Nune’e husi parte RAEOA presiza tebes prezensa SERVE nian iha rejiaun refere maibé sei liuhusi memorandu entendimentu ida atu kesi metin parte rua ne’e atu fasilita emprezáriu sira iha ne’ebá.

Tuir mandatu artigu 4 husi Dekretu Lei númeru 7/2017 SERVE tenke loke nia sukursál iha territóriu tomak, nune’e dezde fevereiru 2017 ekipa la’o bá munisípiu rua Baukau no Bobonaru nomós Rejiaun Espesiál Oekusi.

Nune’e iha loron 1 janeiru 2018 SERVE sei loke nia sukursál dahuluk iha RAEOA hafoin mai Babonaru no Baukau. Antes loke sukursál iha RAEOA, SERVE hala’o ona enkontru ho autoridade sira no hatete katak  presiza tebes prezensa SERVE nian iha fatin ne’ebá.

“Durante ne’e ema ida labá ne’ebá entaun sira atu mai trata de’it sira-nia dokumentu susar tebes no halo renovasaun ne’ebé lahasai kustu ruma tenke mai (Dili) selu otél, aviaun no ró para trata dokumentu. Tanba ne’e mak Prezidente konkorda tebes kuandu SERVE bá loke nia sukursál”, Florêncio relata.

Ho ida ne’e, husi parte jurídiku RAEOA no SERVE nian komunika ba malu hodi estabelese dokumentu memorandu entendimentu iha semana oin atu fó korta ba malu, nune’e parte rua haree no estuda artigu pur artigu atubele konkorda iha parte ne’ebé mak bele hadi’a.

“Akordu ida ne’e sei lori ba ministru ne’ebé tutela ba, husi parte jurídiku ministru nia mós haree no loos hotu ona ita lori ba asina hamutuk para implementa”.

Florêncio relata autoridade hein kleur ona prezensa SERVE nian, nune’e ho Dekretu Lei SERVE nian sei estabelese nia sukursál iha tinan oin maibé asina akordu ho RAEOA sei realiza iha Agostu 2017 antes halo abertura ofisiál.

“Sira dehan ami hein kelur duni, nu’usá mak imi foin mai, depois sira iha pergunta boot ida tanba SERVE sei loke iha Janeiru (2018) no akordu sei asina iha Agostu, entaun husi períodu Juñu to’o Dezembru halo saida? Ha’u hatete ba sira husi períodu ne’e, ita-boot sira lalika bá Dili tanba ha’u husu tiha ona konservadór rua no notariadu públiku iha Oekusi atu kolleta sira-nia dokumetu hotu no verifika no emprezáriu sira lalika mai Dili maibé sira ou SERVE mak ba foti atu prosesa no halo tratamentu espesiál atu fasilita liután sira”.

Tuir pájian ofisiál ZEESM TL ne’ebé TATOLI asesu, iha lansamentu abertura semináriu estabelese SERVE iha loron Tersa 06 Juñu 2017 iha Salaun Parókia Numbei, sai hanesan forum ba emprezáriu tomak iha RAEOA kona-ba oinsá  atu hatene liután servisu SERVE nian no relasaun servisu entre SERVE ho instituisaun relevante sira iha prosesu atividade ekonómika nian.

Prezidente RAEOA, Mari Alkatiri hato’o ba emprezáriu sira tenke hatene regra para aban-bainrua atu tuir konkursu labele halo sala, kuandu iha ona iliminadu ona laiha ona perdua tanba sala ne’e ita-nian rasik, kuandu bad-security falsu mós sala ita-nian rasik. Tan ne’e mak importante tebes iha SERVE, tanba dinámika dezenvolvimentu boot liu no lais liu maka akontese agora ne’e iha Oekusi.

“Nune’e duni husu ba emprezariu tomak atu aprende no kompriende didi’ak saida maka SERVE hato’o, komprende didi’ak lei no regra sira”.

Jornalista: Maria Auxiliadora

Editora: Rita Almeida

HUSIK IDA HATÁN