Komisáriu PNTL mak Lidera Ekipa Sosializa Lei Armas Brankas

0
142
Foto google

DILI, (TATOLI) – Segundu Komandante Polísia Nasionál Timor-Leste (PNTL), Komisáriu Faustino da Costa sei lidera ekipa hodi halo sosializasaun ba públiku kona-ba lei armas brankas ne’ebé regula grupu arte-marsiais.

“Segundu komandante Faustino da Costa maka sei lidera no hahú iha segunda semana oin (12/6) sira hahú ona sosializasaun ba públiku”, dehan Komandante PNTL, Komisáriu Júlio Hornay ba jornalista sira iha Palásiu Prezidensiál Bairo-Pite, kinta (8/6).

Hatutan Ministru Interior, Longuinhos Monteiro, sosializasaun hahú nivél nasionál, instituisaun estadu sira molok kontinua ba munisípiu 11 no Rejiaun Autonomu Espesiál Oecuse.

“Ha’u hateten bebeik laiha toleransia ba  atividade grupu arte-marsiais nian, kualker atividade kaer, hetan farda mos la presiza treinu hetan de’it buat ruma iha bolsu mos simu sansaun prizaun”, dehan Monteiro.

Lei ne’e sei regula arte-marsiais sira hodi la-kria instabilidade iha rai laran. “Agora ita nia lei iha, tempu oin mai buat ne’e sei la mosu, sei la-prejudika ema seluk nia vida”, tenik.

PNTL assume responsabilidade másimu implementa lei ne’e, tanba ne’e membru sira presiza kumpriende uluk kontiudu no prátika husi lei ne’e, nune’e implementa iha terrenu ho di’ak.

Ho kestaun ne’e, realiza workshop ba membru sira iha ótel Ramelau Aimutin, foin lalais ne’e. “Ha’u husu ba partisipante sira atu partisipa ho másimu no toma atensaun, nune’e implementasaun iha terrenu labele falla tanba lei ida ne’e liga ba armas brankas nia utilizasaun”, dehan Komisáriu Júlio iha momentu workshop.

Lei númeru 5/2017 ko’alia kona-ba rejime juridiku relativa ho pratika artes marsiais no rituais, armas brankas, rama ambon no alterasaun kódigu penál.

Partisipa iha sosializasaun lei ne’e Komandante PNTL munisípiu 13, Komandante Unidade Polísia Fronteira, Komandante Polísia Militár, reprezentante husi F-FDTL, Diretór Jerál Alfándega, KRAM (Komisaun Reguladór Arte Marsiais) no Funsaun Públika.

Jornalista: Agapito dos Santos

Editora: Rita Almeida

HUSIK IDA HATÁN