Kódigu Sivíl Artigu 1475 Rekuñese Kazamentu Sivíl Hosi Relijiaun Seluk

0
160
Xefe Governu hato'o votu selebrasaun kmanek loron Eid Al-Fitr ba komunidade musulmanu iha Timor-Leste. Foto dokumentasaun GPM

DILI, (TATOLI) – Primeiru Ministru, Rui Maria de Araújo hateten lei kódigu sivíl artigu 1475 kona-ba kazamentu sivíl, katóliku tradisionál no monogamia rekuñese kazamentu husi relijiaun seluk hanesan protestante, islámiku, hindu no budha.

Líder governu hato’o asuntu ne’e relasiona ho preokupasaun relijiaun seluk ba kódigu sivíl ne’ebé konsidera diskrimina sira.

“Durante ida ne’e ita nia servisu notariadu halo interpretasaun sala, tanba ne’e nu’udar xefe governu halo ona por eskritu ba ministériu justisa atu kurize”, esplika Xefe Governu ne’e hafoin simu preokupasaun hosi Prezidente Repúblika, Francisco Guterres Lú-Olo iha Palásiu Governu, ohin.

Nia hatutan: “Ha’u aproveita oportunidade hato’o ba públiku katak sertidaun kazamentu la’ós katóliku, bele ba servisu notariadu hodi rejista atu sai dokumentu ofisiál”.

Artigu balun husi kódigu sivíl ne’e rekoñese konvensoen husi relijiaun seluk atu rejistu iha servisu notariadu.

“Iha intrepretasaun ne’ebé sala ba kódigu sivíl, iha kódigu sivíl hateten kazamentu ne’ebé rekoñesidu husi pontu de vista sivíl kazamentu katóliku ou kazamentu barlakiadu, ne’e la signifika katak kazamentu husi konvensoen seluk labele rekoñese, tanba kódigu sivíl iha artigu balun hateten husi konvensaun seluk bele rejista atu sira nia sertidaun ne’e rekoñese ofisialmente”, katak.

Jornalista: Agapito dos Santos

Editora: Rita Almeida

HUSIK IDA HATÁN