Kampaña Eleitorál Viola Regra Tránzitu

0
89

DILI,(TATOLI) – Komandante Jerál Polísia Nasionál Timor-Leste (PNTL), Júlio da Costa Hornai hateten kampaña eleisaun lejislativa hahú 20 to’o 27 juñu, akontese simpatizante partidu polítiku sira viola regra tránzitu.

“Militante partidu polítiku sira durante kampaña eleisaun parlamentár, viola regra sinál tránzitu no balun la uza kapasete, hanesan iha Suai seguransa prende motorizada hamutuk 400”, informa KomJer PNTL iha Kuartel Jerál Kaikoli, horiseik.

Maske nune’e, lider partidu polítiku sira no simparizante sira koopera nafatin ho seguransa hodi kumpri regra no selu koima ba motorizada ne’ebé prendidu.

Komandu PNTL agradese ba lider partidu polítiku sira tanba kumpri kompromisu ne’ebé halo molok kampaña, tantu iha nasionál no munisípiu.

“Sira organiza no eduka militante sira hodi kumpri regra no hadook-án hosi aktu violentu hodi kria estabilidade ho pás iha ambiente festa demokrásia”, hateten nia.

Espera katak kampaña eleitorál hotu sidadaun bele mantein nafatin estabilidade iha ámbitu demokrásia hodi ba futuru dezenvolvolvimentu bele la’o di’ak no povu bele sente ukun rasik-án.

Enkuantu, kampaña durante  ne’e la’o hosi munisípiu 12 inklui Rejiaun Autónomu Enklave Oe-Cusse Ambeno (RAEOA) ho situasaun kontroladu hosi PNTL.

Kampaña eleisaun parlamentár hahú ona iha 20 juñu to’o 19 jullu no eleisaun sei akontese iha 22 jullu.

Jornalista: Zezito Silva

Editora: Rita Almeida

HUSIK IDA HATÁN