JSMP Husu PR Foti Desizaun Prudente Ba Polémika Nomeasaun Prezidente Tribunál Rekursu

0
114
Diretór JSMP, Luís Oliveira Sampaio dadalia ho jornalista sira hafoin hasoru malu ho Prezidente Republika, ohin. Foto Tatoli/Xisto Freitas

DILI, (TATOLI) – Delegasaun Monitorizasaun Programa Sistema Judisiál (JSMP) sorumutu ho Prezidente Repúblika, Francisco Guterres Lú-Olo kona-ba polémika nomeiasaun Prezidente Tribunál Rekursu, Deolindo dos Santos.

“Ami mai hato’o ami nia opiniaun ba Prezidente Repúblika kona-ba nomeiasaun Prezidente Tribunál Rekursu ne’ebé maka to’o ohin loron sei iha inserteja nia laran, ami husu ba Prezidente atu halo desizaun ida ne’ebé prudente (bijak) hafoin avalia opiniaun hosi ema hotu-hotu nune’e normaliza situasaun iha setór justisa”, informa Diretór JSMP, Luís Oliveira Sampaio ba jornalista sira iha Palásiu Prezidénsia Repúblika, Bairu-Pité, hafoin enkontru ho Xefe Estadu.

Tuir nia haree to’o agora seidauk iha konkluzaun loloos ba polémika refere no nia fiar katak Prezidente Repúblika hanesan pesoál másimu ba órgaun soberania Estadu ninian sei foti desizaun ne’ebé ho risku ki’ik.

“Prezidente sei foti desizaun hafoin rona ema hotu-hotu nia opiniaun no sei konsulta mós órgaun Estadu sira hotu atu promove polítika para hetan solusaun polítika”, haktuir.

JSMP rekomenda katak atu asegura tribunál nia integridade, Prezidente bele tetu situasaun sira ne’e hotu atu labele afeta normalidade funsionamentu tribunál ninian.

“Tuir ami nia opiniaun katak nomeiasaun ba Prezidente Tribunál Rekursu ne’e legál tanba iha ámbitu kompeténsia Prezidente Repúblika sesante”, esplika.

Antes ne’e, Parlamentu Nasionál halo rezolusaun rekuza nomeiasaun Prezidente Tribunál Rekursu, Deolindo dos Santos tanba la liuhusi avaliasaun ekipa Órgaun Majistratura Judisiál ne’ebé iha kompeténsia halo avaliasaun ba juiz sira tuir klase nomós la rona Governu nia opiniaun antes halo nomeasaun.

Jornalista: Xisto Freitas

Editora: Rita Almeida

HUSIK IDA HATÁN