Jeolojia Importante ba Dezenvolvimentu

0
109
Foto espesiál

DILI, (TATOLI) – Prezidente Institutu Petróleo no Jeolojia (IPJ), Helio C. Guterres hatete jeolojia fundasaun ida importante ba dezenvolvimentu maibé depende ba jeólogu ida-idak atu prepara aan hodi suporta tanba jeolojia la’ós ba rekursu naturál maibé estuda vulkánika, rai nakdoko no halai, erozaun no hola parte ba konstrusaun.

Alinde ne’e, jeolojia mós estuda kona-ba jeoinformasaun no lakohi loron ida ema mak lori dadus, mapa  mai, maibé timoroan rasik mak ka’er mapa no estuda sobre nia rai no presiza hotu-hotu nia kontribuisaun.

“Jeólogu nia karaterístiku ema ida globál tanba rai globál, fatuk globál no jeólogu ida tenke iha kuriozidade boot. Haree husi fatuk ida bele identifika fatuk seluk, haree husi rai ida bele hatene rai seluk”, Helio hatete iha selebrasaun loron jeólogu ne’ebé hala’o iha kampus Universidade Dili, ohin.

Jeólogu ema ida ne’ebé konsidera nia-aan ki’ik tanba idade jeolojia milloens maibé idade ema nia tinan ida lavale buat ida. Tinan 100 ida ema mate ona, idade jeolojia rihun.

“Buat ida naran dezenvolvimentu ne’e liafuan ekonómiku, inserteza boot ida iha ita-nia oin. Sustentabilidade palavra sósiu-ekonómiku inserteza boot iha ita-nia oin, ita lahatene. Buat ida ita hatene mak loron ida ita hakarak hetan uma di’ak, saúde, edukasaun, serbisu ne’ebé di’ak”.

Iha selebrasaun ne’e, prezidente hatete pergunta boot ida ba jeólogu mak atu halo saida?  Fatuk atu halo estrada no uma, jeólogu sira mak atu estuda mas enjeñaria no petróleu importante liu bainhira iha perfurasaun  no sira de’it mak bele halo no jeólogu labele ona.

“Atu dehan kualidae petróleo di’ak ka la’e, forsa petróleu iha okos ka la’e, prezervatóriu boot ka la’e, atu hasai no tein oinsá, iha enjeñeru petróleo nia liman la’ós ona jeolojia nia liman maibé nia serbisu to’o de’it atu identifika, iha ne’ebé, oinsá, naruk to’o hira kona-ba esplorasaun no atu hasai petróleu mak ka’er”, nia haktenik.

Selebrasaun loron jeólogu ne’e hala’o iha Kampus Universidade Dili ho atividade expo durante loron tolu hahú ohin to’o loron 3 juñu 2017 ne’ebé partisipa husi Universidade Nasionál Timor Lorosa’e no universidade privadu sira hodi hatudu kreatividade estudante jeolojia, enjeñaria no petróleu nian husi kada universidade.

Iha biban ne’e mós Vise-Diretór ConocoPhilips, David de Araújo hatete hanesan operadór ba kampu Bayu Undan, mina no gás área Tasi Timór nian sente orgullu ho esplorasaun ne’e, tanba lori rendimentu ba país liuhusi produsaun ne’ebé tama iha fundu petróleu billaun 16 ne’ebé tinan-tinan Governu uza hodi halo dezenvolvimentu.

“Ami sempre tane aas prinsípiu ida katak mina ho gás loron ida sei hotu maibé matenek ka dezenvovimentu rekursu umanu buat ida ne’ebé rohan-la’ek katak matenek liuliu ba juventude atu uza didi’ak tanba instituisaun (universidade) prepara para aban-bainrua matenek ne’ebé iha bele uza iha moris loron-loron”.

Jornalista: Maria Auxiliadora

Editora: Rita Almeida

HUSIK IDA HATÁN