Japaun Ajuda Millaun U$400 ba Fasilidade Aeroportu Dili

0
839
Aeroportu Dili. Foto/Google.

KOVALIMA, (TATOLI) – Ministru Obras Públikas, Transporte no Komunikasaun, Gastão de Sousa informa Governu Japaun fó ajuda ba Timor-Leste ho orsamentu millaun U$400 ba fasilidade iha aeroportu Dili, nune’e negosia oinsá para bele hadi’a daudaun ona aeroportu ne’e.

Gastão dehan aeroportu Dili iha ona faze diskusaun oinsá halo nia finansiamentu atu halo empréstimu ka oinsá, Governu komesa estuda daudaun ona.

“Neineik maibé bele hadi’a daudaun. Ita sei lakonstroe iha tinan ida ka rua nia laran tanba nia iha kapitál ita-nia nasaun nian tenke reprezenta nasaun nia oin ba iha rai-liur enkuantu ita halo diskusaun ba iha ne’ebá,  iha ne’e tenta (Aeroportu Suai) hadi’a nafatin para bele akomoda, no caso ida ne’ebá hadi’a oinsá ita bele rezolve movimentasaun ne’ebé eziste iha Dili”, Gastão dehan foin lalais ne’e iha Suai.

Tanba ne’e mak Governu halo programa ida para estrada sira tenke di’ak. “Ita-boot sira sé mai husi Dili ho karreta bele haree hahú husi Mota-Ulun mai to’o Mota-Masin obra sira ne’e la’o hotu de’it mas ne’e la’ós rezolve de’it iha tinan ida nia laran maibé sé Maromak tulun ita iha tinan rua nia laran, estrada husi Dili mai Suai bele iha kondisaun ida ké di’ak mai ita hotu halo movimentu”.

Atu rezolve movimentasaun voo, Governu iha fulan kotuk aprova ona atu halo estudu detalladu hodi  estende pista Aeroportu Suai ba 2000 resin para bele akomoda voo sira ne’ebé distante liu tanba daudaun Aeroportu Internasionál  Comandante-em Chefe do Estado das Falintil, Kay Rala Xanana Gusmão, Suai iha pista ho métru 1.500.

Atu hadi’a Aeroportu Dili, Governu mós antisipa oinsá bele rezolve situasaun ne’e para projetu iha Dili mós bele la’o.

Jornalista: Maria Auxiliadora

Editora: Rita Almeida

HUSIK IDA HATÁN