Internet difikulta konsulta elektroniku iha TL

0
82
PM Rui Maria de Araujo koalia ho pessoal saude iha Lequidoe, Sabdo foin lalais ne'e.

AILEU (TATOLI)-Primeiru Ministru (PM) Rui Maria de Araújo rekuñese, redi internet difikulta prosesu implementasaun sistema konsulta saúde elektroniku iha Teritóriu Timor laran tomak.

“Ita haree postu sanitáriu ho sentru saúde, iha dezafius lubuk ida maibé funsionamentu agora ita haree komesa di’ak kompara ho tinan 10 liu ba,  programa saúde familia la’o, dadus sira ne’e rekolla hotu ona, maibé sistema dijitál ne’e seidauk la’o to’o 100 %,“ PM informa ba jornalista sira Sábadu, (10/06).

Xefe Governu relata kestaun bazeia ba rezultadu inspesaun ba funsionamentu postu saúde no sentru saúde iha Postu Administrativu Liquidoe, Munisípiu Aileu.

Iha Liquidoe, pesoál saúde sira informa katak, durante ne’e  tenta ona uja ona sim card Timor-Telekom, Telemor no Telkomsel hodi asesu internet, maibé liña internet la ajuda sira hodi asesu ho di’ak.

“Ha’u nia hanoin la’ós iha  Liquidoe de’it, maibé iha  Postu Administrativu barak iha Timor laran tomak hanesan husi kapitál Munisípiu hasoru mós dezafiu ne’ebé hanesan Liquidoe enfrenta, hanesan Fatumea, Fatululik, Fohorem Suai no munisípiu seluk,” Rui Araújo rekuñese.

Entertantu iha sentru saúde Liquidoe moras ispa no isin katar domina iha postu saúde refere. Maibé iha sentru ne’e aimoruk sufisiente atu fó tratamentu ba pasiente sira.

(Jornalista:Agapito dos Santos)

(Editór : Manuel Pinto)

HUSIK IDA HATÁN