Henrique Martins Primeiru Lugár iha Klase Welter Ringan Senior

0
90
Boxista Henrique Martins (Henrik). Imajen espesiál.

DILI (TATOLI)—Boxista ho naran Henrique Martins (Henrik) hosi Asosiasaun Boxe Munisípiu Dili sai primeiru lugár iha klase Welter Ringan Senior (64kg), bainhira halakon boxista Indonézia hosi Asosiasaun Boxe Belu ho naran Libertus G.H.A. ho númeru absoluta (angka mutlak) iha ronde 3.

Boxista ne´ebé antes konsege oferese ona medalla prata (juara 3) hosi eventu internasionál Sea Games Singapura ne’e, iha turnament Regional Open Maliana sai primeiru lugár iha eventu nasionál ne’e.

Hahú ronde (1), Henrik domina kedas pontus tanba hatudu jogu ne´ebé bonitu no másimu tebes hodi tuku (jep, strip no huk) barak liu-ba Libertus (Indo-Belu) nia oin, kabun no ulun, halo boxista Indonézia ne’e tuku mós la hetan.

Iha ronde (2), Henrik kontinua mantein nia jogu hodi nafatin avansa (serang) para bele tuku barak ba Libertus, maibé iha ronde (2) ne’e boxista Indonézia mós konsege tuku halo Henrik hateke fitun badak, maske Henrik blok metin (taka oin).

Maibé, hafoin deskansa hakat ba ronde (3) ikus nian, Henrik ho Libertus la husik malu hodi figth, maske nune’e iha ronde ikus ne’e Henrik nafatin lidera tanba tuku kona barak liu ba Libertus to´o ronde remata. Tanba ne’e, desizaun ikus Henrik maka manán hodi sai primeiru lugár iha klase Welter Ringan Senior (64kg).

Henrique Martins konsidera katak nia kontra la´ós boxista ne´ebé kualker maibé profisionál, tanba nia (boxista Indo) mós prepara hela atu ba kompete iha eventu internasionál Sea Games Malázia, 2017.

“Ha´u senti kontenti tebes, tanba ha´u konsege sai primeiru lugár,” Henrik ba Jornalista sira iha Jináziu Maliana, sesta (02/06).

Segundu lugár iha klase Welter Ringan Senior maka Libertius G.H.A no  terseiru lugár maka Francisco G. Primeiru lugár iha  klase Welter Ringan Junior maka Sávio Ramos, segundu lugár Juvito Ximenes no terseiru Andre D. ho Sulti Mutar . (Jornalista: Xisto Freitas)

HUSIK IDA HATÁN