Governu Re-aprova Dekretu Lei Transformasaun RTTL.ep

0
412
Enkontru Konsellu Ministru, ohin. Foto GPM

DILI, (TATOLI) – Konsellu Ministru, ohin halo aprovasaun ba dekretu lei  númeru 42/2008, 26 novembru  hodi tranforma Radiu Televizaun Timor Leste ba Empreza Públika (RTTL.ep).

Sekretariu Estadu Komunikasaun Sosiál, Nélio Isaac Sarmento hateten re-aprovasaun ne’e akontese tanba eis Prezidente Repúblika, Taur Matan Ruak la-konsege promulga.

“Ohin ha’u lori fila fali mai Konsellu Ministru hodi halo re-aprovasaun ba alterasaun dekretu lei ne’e hodi haruka fila fali ba Prezidente Repúblika, Francisco Guterres Lú-Olo hodi promulgaʺ, dehan nia ba jornalista sira iha Palásiu Governu.

Dekretu lei ne’e atu fó kbi’it ba orgaun másimu RTTL.ep atu  funsiona hanesan empreza públika. “Konsellu administrasaun maka sai nain prinsipál ba RTTL.ep tanba uluk iha de’it prezidente ho vogál sira ho membru ne’ebé sira nia servisu la’ós permanente maibé iha alterasaun ne’e ita husu atu prezidente ho vise nain rua atu servisu permanenteʺ, hatutan.

Alende ne’e iha alterasaun ne’e governu halakon órgaun konsellu opiniaun hodi hamosu de’it konsellu administrasaun no konsellu fiskál.

“Ita halakon konsellu opiniaun, konsellu fiskál atu haree orsamentu ne’ebé maihusi Estadu no reseita ne’ebé tama no programa sira seluk ne’ebé RTTL.ep sei husu ba governuʺ, katak.

Governante hatutan alterasaun ne’e atu fó kompeténsia másima ba RTTL.ep hodi halo rekrutamentu ba funsionariu RTTL.ep sai funsionariu empreza la’ós funsionariu públiku.

Alterasaun ne’e mós sei hadi’a programa emisaun iha RTTL.ep hodi kompete ho mídia privada  sira seluk.

Jornalista: Agapito dos Santos

Editora: Rita Almeida

HUSIK IDA HATÁN