Governu Oferese Millaun 1.5 ba Portugal

0
259
Reuniaun Konsellu-Ministru, ohin. Foto GPM

DILI, (TATOLI) – Sekretariu Estadu Konsellu Ministru, Avelino Coelho hateten governu liuhosi enkontru Konsellu Ministru, ohin, aprova millaun 1.5  ba Portugal hodi apoiu vítima ahi han rai (incêndio florestal) ne’ebé akontese iha sentru norte Portugál.

Dezastre ne’e rezulta ema 60 resin mate no estraga infrastutura bázika. “Governu aprova rezolusaun, apoiu ba Portugal ne’e millaun 1.5 hodi rezolve problema dezastre ahi han raiʺ, dehan governante ne’e ba jornalista sira iha Palàsiu Governu.

Rezolusaun governu ne’e aprezenta husi Ministra Finansa, Santina Cardoso. Orsamentu ne’e governu foti husi dotasaun apoiu umanitaria ba 2017.

Primeiru Ministru, Rui Maria de Araújo hatete lori povu no Estadu hato’o sentimentu kondolénsia ba família ne’ebé lakon ninia ema iha akontesementu ne’e.

“Governu Timor-Leste hato’o ninia kondolénsia ba família no belun sira ne’ebé lakon família no belun sira-nia moris no haruka lia-tatolin apoiu nian ba Prezidente, Marcelo Rebelo de Sousa no ba Primeiru-Ministru, António Costa iha momentu difisil ida ne’eʺ, hateten lidér governu.

Jornalista: Agapito dos Santos

Editora: Rita Almeida

HUSIK IDA HATÁN