Governu Norte Territóriu Sei Ajuda Karau ba Timor-Leste

0
105
Karau Timur. Foto Google.

DILI, (TATOLI) – Ministru Agrikultura no Peska, Estanislau Aleixo da Silva infoma, Governu Norte Territóriu sei ajuda karau ho rasa Timur kuaze 20 ba Timor-Leste.

“Ami reuniaun iha Austrália dehan iha rasa karau Timur, atu hanesan karau Timur ida ké rezistente ba moras ida ne’e, moras ne’e lada’et. Ne’e mak ami iha kontaktu ho Austrália ona halo reuniaun ho Departamentu Agrikultura no Indústria Primária ne’ebá nian no sira hein de’it sira-nia Chief Minister Norte Territóriu nian bainhira Governu (Norte Territóriu) hatete sim, sira bele mai ona”, Estanislau dehan iha Komoro, ohin.

Estanislau relata, ohin loron Timor-Leste problema ho karau Timur tanba aleinde atu han nomós iha lia fetosá-umane, ema ruma mate karau sira ne’e utiliza hodi oho nomós iha problema seluk mak moras ida ne’ebé boot tebes halo karau mate mak bruceloza ne’ebé halo karau-oan mate iha karau inan nia kabun-laran no ida ne’e moras ida ne’ebé da’et bainhira husik karau arbiru de’it.

Aleinde ne’e, ministru Estanislau mós hasoru ona Chief Minister hodi informa kona-ba enkontru entre parte rua no  hatete katak laiha problema no lakleur tan sei lori karau sira ne’e mai Timor-Leste.

“Maibé ita tenke tau osan, karau sira ne’e atu mai ho ró ka aviaun, ne’e ita mak tenke selu mas osan parese iha”.

Husi parte Austrália sei bele fó karau 20 mas depende  ba tékniku sira mak hatene presiza karau hira tanba lori mai ne’e, sei lafahe arbiru maibé sei halo kruzamentu no melloramentu ne’ebé sei hahú husi fatin balun depois komesa habelar ba fatin seluk.

Jornalista: Maria Auxiliadora

Editora: Rita Almeida

HUSIK IDA HATÁN