Governu Kanada Sei Ajuda TL Prevene Violénsia Bazeia ba Jéneru

0
39
Foto google

DILI, (TATOLI) – Hafoin entrega karta kredensiál ba Prezidente Repúblika, embaixadór Kanada iha Timor-Leste, Peter Macarthur hamutuk ho sekretaria estadu asuntu feto diskute kona-ba posibilidade atu esplora kooperasaun iha área jéneru nian.

“Ami ohin diskute hamutuk kona-ba asuntu jéneru nian ho objetivu atu hametin liu tan posibilidade kooperasaun direta entre governu hosi nasaun rua”, hateten Diretór Jerál SEM (Sekretaria Estadu asuntu Mulleres), Armando da Costa ba jornalista sira hafoin hasoru malu ho embaixadór Kanada, Peter Marcathur iha Kaicoli, loraik ne’e.

Tuir nia, asuntu ne’ebé mak diskute hanesan prevensaun violénsia bazeia ba jéneru, kapasitasaun feto iha moris ekonómiku, kapasitasaun lideransa feto iha nivél nasionál no munisipál no polítika integradu abordazen ba jéneru.

“Asuntu importante ne’ebé diskutivel liu mak apoiu sosíu ekonómiku feto, prevensaun violénsia asuntu feto ho labarik no partisipasaun feto iha nivél foti desizaun lideransa”, akresenta.

Enkuantu, partisipasaun feto iha vida ekonómiku importante tanba SEM fó atensaun ba dezenvolvimentu kapasidade sosíu ekonómiku feto liuhosi fundu transferénsia ba formasaun no kapasitasaun ba grupu feto iha Dili no munisípiu hotu ho objetivu atu bele hasa’e rendimentu ekonómiku família nian.

Enkuantu, SEM ho governu Kanada durante ne’e ladauk iha kooperasaun direta maibé apoiu sira nian mai Timor-Leste liuhosi NGO ne’e la’o tinan barak ona.

Jornalista: Zezito Silva

Editora: Rita Almeida

HUSIK IDA HATÁN