Governu Foun Tenki Internasionaliza Turizmu

0
115
Diretór Ezekutivu SERVE, Florêncio Sanches.

DILI (TATOLI)- Diretór Ezekutivu  Servisu Rejistu no Verifikasaun Emprezariál (SERVE), Florêncio Sanches hein katak, VII Governu ne’ebé sei mai presiza estabelese no haforsa liután dezenvolvimentu ekonómiku no turizmu nian iha rai-liur  no labele hein de’it iha rai-laran.

Florêncio hatete ida ne’e relasiona ho kompañia manufatureira lima husi Indonézia ne’ebé foin daudaun mai iha Timor-Leste ne’ebé gasta tempu semana ida hodi hala’o vizita iha ministériu sira maibé lahetan informasaun kle’an oinsá mak bele investe iha nasaun ida ne’e.

“Sira dehan ami mai gasta osan, tempu no buat hotu maibé dalaruma hetan informasaun rohan de’it. Tanba sira hamahon-an iha grupu boot ne’ebé Governu Indonézia mak halo no mai iha ne’e atu hatene indústria bee nia, agrikultura halo oinsá maibé infelizmente informasaun ne’ebé ita fornese ba sira ladún full, ida ne’e mak dezafia mai ita hotu atu hadi’a iha futuru,” Florêncio dehan iha Matadouru, ohin.

Kompañia manufatureira sira ne’e mai husi Illa Java, Sulawesi no Kalimantan ne’ebé hakarak investe iha Timor-Leste no entre kompañia ne’e mak ida investe iha ró tanba sira rona katak Timor-Leste iha planu atu iha ona fábrika ró ida no ida seluk mak fábrika siomay.

“Atu mai loke de’it fábrika siomay ne’e mós susar tebes maibé ha’u dehan halo favór mai filafali kuandu ami iha tiha ona governasaun foun para ita fó tan informasaun di’ak liután. Informasaun ita fó tanba ohin loron ema kestiona maka’as katak ita-nia fundu mina-rai menus ba beibeik entaun opsaun mak dezenvolve setór privadu husi rai-maran nian, turizmu, komérsiu ita foti sa’e para hamenus dependénsia ba mina”.

Nune’e SERVE konvida Kompañia manifatureira lima ne’e atu  mai fali Timór hodi hatene infomasaun klaru liután no sira hakarak investe tanba haree husi taxa Timor-Leste nian iha de’it porsentu 10 no aproveita benefísu ne’ebé Estadu ne’e iha atu dezenvolve nogósiu no timoroan mós bele hetan benefísiu.

Entertantu Florêncio konsidera fórum negósiu ne’ebé TradeInvest Timor-Leste foin lalais halo iha Darwin-Austrália mak akontese tan sei atrai investidór barak atu mai investe iha país ida ne’e.

 (Jornalista : Maria Auxiliadora, Editór : Manuel Pinto)

HUSIK IDA HATÁN