Funsionáriu Públiku Tuir Kampaña Parlamentár, Presiza Husu Lisensa

0
50
Provedór Direitus Umanus no Justisa, Silveiro Pinto Baptista.

DILI, (TATOLI) – Provedór Direitus Umanus no Justisa (PDHJ), Silveiro Pinto Baptista hateten funsionáriu públiku sira bainhira partisipa kampaña parlamentár ne’ebé sei hahú iha loron 20 juñu, presiza husu lisensa ba Komisaun Funsaun Públiku no labele uza patrimóniu Estadu iha periodu kampaña eleitorál.

Nia esplika Komisaun Funsaun Públiku prepara ona formuláriu ida hodi distribui ba partidu sira inklui Autoridade Rejiaun Autónoma Espesiál Oe-Cusse Ambeno para fó ba funsionáriu públiku sira iha ne’ebá hodi priénse antes partisipa eleisaun.

“Ami mós sei hato’o karta ba iha líder partidu polítiku sira atu labele involve labarik sira iha prosesu kampaña liu-liu tara tais ba líder partidu polítiku sira no dansariña iha kampaña. Eleisaun jerál ne’e festa demokrasia ba ema adultu, la’ós ba menor idade”, dehan ba jornalista sira iha Palásiu Prezidénsia Repúblika, Bairu-Pité, Dili, sesta ne’e.

PDHJ, Komisaun Antí Korupsaun (KAK) no Komisaun Direitu ba Labarik, téknikamente túr hamutuk ona hodi elabora pontus balun no iha segunda oin entre PDHJ, KAK no Komisaun Direitu ba Labarik, sei hato’o deklarasaun ba iha lídere partidu polítiku sira katak komisaun tolu ne’e sei serbisu hamutuk hodi halo monitorizasaun ba kampaña eleitorál.

Jornalista: Xisto Freitas

Editora: Rita Almeida

HUSIK IDA HATÁN