Fujitivu POLRI Hetan Interogativu Dahuluk iha TDD

0
237
Fujitivu POLRI hafoin prosesu interogatoriu dahuluk iha Tribunál Distritál Dili, sesta, (23/6). Foto Tatoli/Antonio Goncalves

DILI, (TATOLI) – Fujitivu (buronan) Polísia Repúblika Indonézia (POLRI) nain rua ne’ebé Polísia Nasionál Timor-Leste (PNTL) kaer iha Novo Turizmu, kinta (22/6), hetan interogatoriu dahuluk hosi Tribunál Distritál Dili (TDD), ohin, tanba tama Timor ho ilegalmente.

“Sira konfesa katak tama mai Timor-Leste ho ilegál hanesan faktu ne’ebé labele nega no sei koopera ho justisa atu foti medida”, haktuir defensór hosi defensoria públika, José Guterres ba jornalista hafoin julgamentu.

Interogativu dahuluk ne’e la’ós husu sira nia kulpa maibé atu husu de’it katak tenke aplika medida koezaun.

Nia hatutan, fujitivu sira dehan hakarak fila ba Indonézia maibé aplika kódigu imigrasaun foun ne’ebé sai iha 2017, la’ós uza kódigu antigu nian. Enkuantu kódigu foun ko’alia kona-ba afastamentu (hases-án) no la’ós espulsaun.

Tuir nia, Timor-Leste laiha akordu estradisaun ho Indonézia no laiha kooperasaun judisiáriu, maibé iha de’it kooperasaun entre polísia sira.

Interogatóriu ne’e sei kontinua aban iha tuku 10:30 hafoin bele foti desizaun. “Agora sira fila ba komarka no aban mak foin hetan rezultadu atu haree medida koezaun ne’ebé tenke aplika”, esplika nia.

Entretantu, Komandante Jerál PNTL, Júlio da Costa Hornai iha aeroporto internasionál Dili hafoin simu Komandu Polísia Provinsia Bali ho delegasaun hateten prosesu atu sira fila sei la’o no sei hein desizaun hosi tribunál.

Servisu investigasaun kriminál, PNTL ho Unidade Polísia Maritima, kinta (22/6), iha tuku 10.00, Portu Dili, kaer sidadaun Tesaloniki, Grécia (Yunani) ho naran Georgios Nicolas no ida seluk hosi India, Saed Mohammed durante ne’e fujitivu ba POLRI tanba komete kazu fase osan no droga.

Enkuantu, Inspetór Jerál Polísia, Petrus Golose ho ekipa hamutuk 17 to’o iha aeroportu Nicolau Lobato iha tuku 14:00 ho aviaun privadu atu mai simu fujitivu sira ne’e.

Jornalista: Zezito Silva

Editora: Rita Almeida

http://www.tatoli.tl/2017/06/kapolda-bali-sei-uza-jet-privadu-hodi-simu-fujitivu-polri/

HUSIK IDA HATÁN