Formasaun Kontinua Importante ba Autór Judisiál

0
139
Prezidente KRL bainhira entrevista ho profisionál komunikasaun sosiál sira. Foto: KRL

DILI, (TATOLI)—Prezidente Komisaun Reforma Lejislativa, Jorge Graça hateten bainhira la iha kapasitasaun, dezenvolvimentu institusionál ba setór judisiál, estadu direitu demokrátiku bele iha ‘périgu’ tanba ne’e formasaun kontinua importante ba autór judisiál sira.

“Formasaun kontinua ita hotu tenke asume tanba formasaun kontinua mai husi serbisu”, hateten Jorge Graça ba ajénsia Tatoli, iha Hotel Timor, foin lalais ne’e.

Formasaun ne’e, ita bele bolu korpu formadór, profisionál timoroan nomós husi rai seluk hodi mai fahe sira-nia esperiénsia, koñesimentu, informasaun depois ita halo selesaun, análize komparativu hodi implementa tuir ita-nia realidade.

“Kria sentidu ekipa no kresimentu konjuntu instituisaun tomak, la’ós elementu esternu hanesan korpu estrañu ne’ebé mak mai no ba”, nia realsa.

Hodi reforsa katak Komisaum Reforma Justisa no autór judisiál sira mós haree kona-ba saida mak sei halo atu iha lei organizasaun judisiál ida ne’ebé mak refleta ita-nia realidade.

Nune’e mós, ita-nia nesesidade, ita-nia kapasidade mós fó dalan ba sistema tribunál, haree mapa judisiáriu, haree kapasidade no kritéria sira ne’ebé hakarak to’o.

Haree ba espesializasaun tribunál sira, ba sívil, komersiál, buat sira ne’e hotu apoiadu ho programa formasaun, la’os de’it ba juíz sira maibé mós ba ofisiál justisa, funsionáriu.

“Lei organizasaun judisiária, la’ós hanesan figura ida de’it maibé instrumentu ida atu jere, dezenvolve tribunál nomós dezenvolve instituisaun sira seluk”, akresenta.

Tanba bainhira konsentra de’it iha tribunál mós bele aumenta efeitu. “Tanba ne’e envolve sistema tomak husi ministériu públiku, defensória públika, ministériu justisa, tanba sira mós iha kna’ar atu halo sistema ida ne’ebé mak di’ak ba ita-nia sidadaun”, konklui.

Jornalista: Rafy Belo

Editora: Rita Almeida

HUSIK IDA HATÁN