DILI (TATOLI)- Fos tonelada hamutuk 4.798,575 ne’ebé rai iha armazein Sentru Lojístika Nasionál (SLN) 03 Tibar, Ministériu Komérsiu, Indústria no Ambiente (MKIA) ne’ebé Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) foti amostra saku 15 hodi halo teste ba teór-bee nia (kadar air) hatudu rezultadu kualidade foos ne’e menus ona.
Rezultadu teste ne’e indika ho valór médiu porsentu 12.93, no valór ne’e signifika katak kualidade husi foos refere menus ona tanba latama ona iha kritéria kualidade foos nia no kritériu loloos mak porsentu 14 (kualidade I-IV) to’o porsentu 15 (kualidade V).
Maibé Diretór Meterolojia no Padronizasaun, José Manuel dos Reis dehan, lasignifika katak ho rezultadu teste teór-bee ne’e, bele responde ba kualidade husi foos refere di’ak ka ladi’ak atu ba konsumu husi ita ema (perigozu ba ita ema).
Tanba atu garantia ba kualidade foos nian, presiza mós hala’o teste ba parámetru sira seluk hanesan teste mikrobiolojia, aflatoksin, no kímiku.
“AIFAESA rasik halo komunikasaun ho laboratóriu Ministériu Saúde nomós Ministériu Agrikultura no peska maibé seidauk iha ekipamentu adekuadu hodi halo teste ba parámetru hirak ne’e,” José Manuel dos Reis informa ba TATOLI, iha Matadouru, Sesta (09/06)
Relasiona ho rezultadu teór-bee AIFAESA liuhusi Departamentu Metrolojia no Padronizasaun rekomenda ba SLN iha tempu badak nia laran atu halo teste kontinuasaun ba parámetru sira ne’e iha laboratóriu ne’ebé akreditadu.
“SLN labele halo distribuisaun foos sira ne’ebé mak eziste iha armazein O3 Tibar, ba ema hodi konsumu bainhira seidauk iha rezultadu kontinuasaun fixu kona-ba kualidade foos refere no kria kondisaun konservasaun ne’ebé di’ak iha armazein SLN Tibar,” José husu.
No koordenadór AIFAESA, Abílio Oliveira hatutan ho rezultadu ne’e, nia rasik komunika ba Departamentu Meterolojia atu komunika mós ba SLN hodi nune’e foos ho kuantidade ne’ebé iha tanba nia kualidade tun ne’e tau ketak tiha.
Entertantu Foos iha armazein O3 Tibar ne’e importa husi Vietname ne’ebé sosa ho Orsamentu Jerál Estadu 2015 no tama iha armazein loloos iha tinan 2016 ho tonelada hamutuk 9000 ho osan pur volta millaun U$3.740 ne’ebé daudaun ne’e hela tonelda 4.798,575.
(Jornalista : Maria Auxiliadora)
(Editór : Manuel Pinto)
