Foos Armazein 03 Tibar Nia Kondisaun Sei Di’ak

0
29
Funsionáriu SLN halo limpeza iha armazein 03 Tibar hodi hamoos saku foos ne’ebé fo’er. Foto/SLN.

DILI, (TATOLI)– Prezidente Konsellu Administrasaun, Sentru Lojístiku Nasionál (SLN), Nívio Magalhães informa, foos ne’ebé rai iha armazein O3 Tibar nia kondisaun sei di’ak no lakontaminadu ho mikrobiolojia no kímiku ruma ne’ebé perigozu ba ema nia saúde.

“Saku foos nian iha liur fo’er, maibé fo’er tanba armazein ne’ebé konstrui iha IV Governu Konstitusionál nia kondisaun agora ladún di’ak. Atu rezolve problema ne’e, SLN halo ona limpeza hodi hamoos saku ne’ebé fo’er no SLN mós sei reabilita armazein ne’e tanba ho kondisaun  ne’ebé di’ak mak bele asegura kualidade foos ne’ebé rai iha armazein,” Nívio Magalhães informa ba TATOLI, foin lalais ne’e.

Nia promete katak atu suporta programa merenda eskolar SLN sei aloka foos ne’ebé ho kualidade di’ak ba programa ne’e tanba benefisiáriu husi programa ne’e mak futuru nasaun nian.

Relasiona ho rekomendasaun husi  Autoridade de Inspesaun no Fiskalizasaun  Atividade Ekonómika, Sanitária e Alimentár (AIFAESA) atu SLN halo teste ba foos http://www.tatoli.tl/2017/06/foos-iha-armazein-tibar-kualidade-menus/ ne’ebé rai iha armazein 03 Tibar, nune’e SLN husu Sucufindo Indonézia atu halo teste laboratóriu kompletu ba foos refere bazeia ba estandarte.

Teste laboratóriu ne’ebé halo husi Sucufindo mak SNI 6128:2015 kona-ba foos, SNI 01-4866-1998 sobre teste kontaminasaun arséniu iha hahán, SNI 01-2896-1998  kona-ba teste kontaminasaun metál iha hahán no SNI 01-2891-1992 teste sobre hahán no hemun.

“Tanba AIFAESA haree ba kadar air (teór bee) de’it, ne’ebé restu tan ne’e SLN halo hotu teste ba parámetru sira hanesan kualidade foos, kímiku, biolojia no mikrobiolojia ne’ebé nia rezultadu negativu hotu. Ami hato’o tiha ona rezultadu ne’e ba AIFAESA, tanba ne’e mak ami deside atu kontinua programa hasai foos iha armazein tanba foos ne’e laperigozu ba saúde”, Nívio dehan  iha Bebora-Dili.

(Jornalista : Maria Auxiliadora, Editór : Manuel Pinto)

HUSIK IDA HATÁN