FBATL Triste SEJD La Marka Prezensa

0
35
Seremónia enserramentu Turnament Regional Open iha Jináziu Maliana. Imajen espesiál

DILI (TATOLI)—Federasaun Boxing Amadora Timor-Leste (FBATL)  sente triste tanba iha abertura Turnament Regional Open Boxing laiha prezensa ida hosi membru Sekretaria Estadu ba Juventude no Desportu (SEJD).

Sekretáriu Jerál Federasaun Boxing Amadora Timor-Leste (FBATL), Mariano Smith konsidera ida ne’e hanesan failansu boot, tanba bainhira atu halo eventu Boxing  iha Munisípiu Maliana, parte FBATL antes haruka ona karta ba SEJD. Hafoin ne´e sira hein besik to´o kalan mós SEJD nia ema ida la mai.

“Ami komfirma diretamente via telefónema ba iha Diresaun Gabinete, maibé sira dehan katak ami la hato’o fali karta ba iha ne’ebá. Tanba ne’e maka ita la hatene sala ne’e iha parte ida ne´ebé. Ami federasaun maka la hato’o karta ka ou SEJD maka la konsidera ami nia asuntu ida halo eventu iha munisípiu ne’e,” nia dehan ba jornalista sira iha abertura Turnament Regional Open iha Jináziu Munisipál Maliana, Tersa ne´e, ne´ebé ajénsia TATOLI asesu hosi fonte prinsipál hosi FBATL.

Maske nune’e, Smith hatete ida ne’e la´ós sai problema tanba iha eventu ne’e partispa mós hosi Prezidenti Autoridade Munisípiu Bobonaro,  Prezidenti CDTL, Komandante Unidade Patrollamentu Fronteira (UPF), komandante F-FDTL Maliana, inklui komunidade Maliana ne´ebé maka antusiasmu hodi asiste eventu ne’e.

Enkuantu, Prezidenti Autoridade Munisípiu Bobonaro, Zeferino Soares do Santos, agradese ba FBATL tanba hili ona Munisípiu Bobonaro maka sai uma na´in ba eventu ne’e no eventu ne’e anima loos komunidade Munisípiu Bobonaro.

Zeferino mós agradese ba boxista hosi nasaun Indonézia, tanba bele marka ona prezensa iha eventu ida ne’e. Nia fiar katak liuhusi prezensa boxista Indonézia sira ne’e, boxista timoroan bele gaña liu-tan kapasidade, nune’e bele prepara di´ak liu-tan iha nível ás. (Jornalista: Xisto Freitas)

HUSIK IDA HATÁN