Estadu iha Dever Proteje Direitu Labarik

0
53
FOTO TATOLI

DILI, (TATOLI) – Labarik husi tinan 16 mai kraik iha direitu atu hetan protesaun husi Estadu tuir konvensaun internasionál nasoen unida ba direitu labarik ne’ebé Timor-Leste ratifika iha 2003.

Primeiru Ministru, Rui Maria de Araújo hato’o polítika Estadu ne’e durante komemorasaun loron internasionál ba labarik ne’ebé selebra iha Palásiu Prezidensiál Bairo-Pite Dili, kinta (1/6).

ʺNu’udar ami nia dever hanesan orgaun Estadu nian nomos hanesan sidadaun atu rekoñese, respeita, no proteje imi nia direitu no promove imi nia dignidade no krezimentu iha ambiente ne’ebé saudável atu imi bele atinje imi nia potensialidade tomakʺ, dehan.

Tinan 13 ona Estadu ratifika konvensaun nasoen unida ba diretu labarik ne’ebé ONU adopta  iha 1989, tanba ne’e ita mós iha ona planu asaun nasionál ba labarik.

ʺIta mós adopta no implementa juridiku lubuk ida ne’ebé ajuda hadi’a no hametin liutan protesaun ba diretu labarik ne’ebé kontempla ona iha konvensaun ne’eʺ, tenik.

Tuir planu asaun annuál ba labarik 2016-2020 refleta vontade governu atu harii ambiente ne’ebé respeitu, protesaun no kumprimentu diretu labarik feto no mane, liliu sira ne’ebé moris ho situasaun la-dun favorável iha área remota.

Lidér governu hateten tenke enkaixa planu asaun ba labarik iha planu orsamentál iha liña ministériu  sira hanesan edukasaun, saúde, sosiál, justisa no seluk tan.

ʺIta tenke fó prioridade ba reprezentasaun labarik sira iha planeamentu órgaun governu ida-idak, durante ezekusaun planu iha alokasaun orsamentu ka finansiamentuʺ, hatutan.

Alende, orsamentu, tuir lidér governu katak rekursu  kolokasaun rekursu úmanu  hodi apoiu implementa planu asaun ne’e tenke sufisiente.

Komemorasaun ne’e partisipa husi Prezidente Repúblika, Francisco Guterres Lú-Olo, Primeiru Ministru, Rui Maria de Araújo, eis Prezidente Repúblika, Taur Matan Ruak, eis Prezidente Parlamentu Nasionál, Vicente Guterres, korpu diplomátiku, ajénsia internasionál no seluk tan.

Jornalista: Agapito dos Santos

Editora: Rita Almeida

HUSIK IDA HATÁN