DILI (TATOLI)– Komandate Jerál PNTL, Julio da Costa Hornay informa, la iha negósiasaun ba kriminozu sira, maibé husu sidadaun tomak tantu internasionál sira hela iha Timor atu asegura pas no estabilidade iha elisaun parlamentar (elpar) so nune’e mak bele dignifika Timor nia dignidade.
“Katuas no ferik, mane no feto, labarik no joven, estudante no analfabetizmu, rai nain no estranjeiru ne’ebé moris eh hela iha Timor-Leste atu kontribui ba páz no estabilidade liuhosi prosesu eleisaun, hahú hosi prosesu kampaña to’o eleisaun no toma posse ba VII governu konstitusionál,” Komisariu Julio Hornay husu liuhosi konfrensia imprensa iha Kuartel Jerál PNTL, Kaikoli, Tersa (13/06).
Iha eleisaun prezidensiál no eleisaun suku ne’ebé liu ona tanba la’o iha ambiente hakmatek basa aseguradu hosi seguransa PNTL ho F-FDTL ne’ebé di’ak, ikus mai Timor-Leste hetan apresiasaun hosi Nasaun Unidu no Uniaun Europeia, katak, Timor nasaun foin ukun-an, maibé páz no estabilidade nu’udar prinsípiu úniku.
“Laiha negosiasaun PNTL no F-FDTL hanesan aparellu estadu deside kria seguransa ne’ebé koordenadu hodi apoiú malu ba segurasan prosesu kampaña no to’o eleisaun lejislativa ho rigór,” Julio Hornay reforsa.
Timoroan iha responsabilidade atu asegura eleisaun parlamentár ho di’ak iha ambiente ne’ebé nakonu ho páz no dame, nu’udar kestaun responsabilidade, nasionálizmu, patriotizmu hodi dignifika dignidade hanesan nasaun independetemente iha Republika Demokratika Timor-Leste (R-DTL).
Enkuantu, ema eh grupu ruma koko atu kria instabilidade ka problema iha ambiente eleisaun, hosi seguransa sei foti medida ne’ebé forte, laiha tan negosiasaun, tanba prosesu eleisaun nu’udar prosesu polítiku rai ida nian, nune’e presiza tebes iha ambiente ne’ebé páz ho dame hodi fo susesu ba festa demokrásia.
Ba joven sira atu kuda espiritu nasionálizmu no obrigatóriu atu kontribui páz no estabilidade ba rain rasik, nune’e tenke hapara konflitu hodi kria estabilidade no lalika inklina an ba iha konflitu, tenke hakribi violénsia, tenke hakribi aktu krime maibé kuandu kontra, seguransa sei toma medida.
Husu mós ba lidere partidu polítiku atu toma responsabilidade hodi fo edukasaun ba militante sira atu respeita malu, fiar malu no koopera malu hodi kria estabilidade no páz, bainhira akontese kampaña parlamentár iha 20 Juñu no 22 Jullu.
(Jornalista : Zezito Silva, Editór : Manuel Pinto)
